গুৱাহাটী, 11 মে’: মুখ্যমন্ত্ৰী হিচাপে দায়িত্বভাৰ লোৱাৰ পাচত মঙলবাৰে পুৱাৰ ভাগতে গুৱাহাটীস্থিত ৰাজ্যিক বিজেপি কাৰ্যালয়ত উপস্থিত হয় ড৹ হিমন্ত বিশ্ব শৰ্মা ৷ দলীয় কাৰ্যালয়ত উপস্থিত হৈ দলীয় নেতা-কৰ্মীসকলক সাক্ষাৎ কৰে নৱ নিযুক্ত মুখ্যমন্ত্ৰীগৰাকীয়ে । লগতে তেওঁ বিজেপিৰ নেতা-কৰ্মীৰ সৈতে এক আলোচনাত মিলিত হয় ।
মুখ্যমন্ত্ৰীৰূপে শপত গ্ৰহণৰ পাচত প্ৰথমবাৰৰ বাবে বিজেপিৰ ৰাজ্যিক কাৰ্যালয়ত উপস্থিত হয় মুখ্যমন্ত্ৰী ড৹ হিমন্ত বিশ্ব শৰ্মা । সাংবাদিকৰ আগত মুখ্যমন্ত্ৰী শৰ্মাই কয় যে, এতিয়াৰে পৰা তেওঁ প্ৰতিমাহে এখনকৈ সংবাদমেল সম্বোধন কৰিব আৰু সকলো সময়তে সাংবাদিকৰ প্ৰশ্নৰ উত্তৰ দি নাথাকে । ইয়াৰ বাবে এজনক দায়িত্ব দিয়া হ’ব । আনহাতে, বিয়লি 6 বজাত নতুন মন্ত্ৰীসভাৰ প্ৰথমখন কেবিনেট বৈঠক অনুষ্ঠিত হ’ব বুলিও তেওঁ জানিবলৈ দিয়ে ।
উল্লেখ্য যে, বিজেপিৰ ৰাজ্যিক কাৰ্যালয়ত মুখ্যমন্ত্ৰী শৰ্মাই দলৰ উপ-সভাপতি আৰু সাধাৰণ সম্পাদকসকলৰ সৈতে আলোচনাত মিলিত হয় । আলোচনাত ৰাজ্যিক সভাপতি ৰণজিৎ কুমাৰ দাসৰ উপৰিও সাংসদ দিলীপ শইকীয়া, তপন গগৈ, পল্লৱ লোচন দাসকে ধৰি কেইবাগৰাকীও নতুন মন্ত্ৰী উপস্থিত থাকে ৷
লগতে পঢ়ক : ড৹ হিমন্ত বিশ্ব শৰ্মালৈ শুভেচ্ছা ধেমাজি জিলা অধিবিদ্যা পৰিষদৰ
