গুৱাহাটী, ৯ আগষ্ট : কমল কুমাৰ মেধিক আপৰ পৰা নিলম্বনক লৈ কামৰূপ মহানগৰ দেৱানী আদালতৰ গুৰুত্বপূৰ্ণ ৰায় ৷ 'আপ’ অসমে কমল কুমাৰ মেধিক কৰা নিলম্বনত স্থগিতাদেশ জাৰি কৰিছে আদালতে ৷ ইয়াৰ পিছতে কমল কুমাৰ মেধিয়ে প্ৰতিক্ৰিয়া প্ৰকাশ কৰি কয় - “ মই ন্যায় পালোঁ ৷ মোক বদনাম কৰিবলৈ কৰা ষড়যন্ত্ৰ ব্যৰ্থ হ’ল ৷ ৰাজনৈতিক ভাৱে মোক নিঃশেষ কৰাৰ যি ষড়যন্ত্ৰ ৰচনা কৰিছিল সেই ষড়যন্ত্ৰ ইয়াতে অন্ত পৰিব বুলি আশা কৰিছোঁ ৷"
তেওঁ আৰু কয় যে, "৪ জুলাইত আপে মোক কৰা নিলম্বন দলৰ সাংবিধান অনুসৰি হোৱা নাছিল ৷ ৰাজ্যিক সভাপতিয়ে ৰাজ্যিক উপ-সভাপতিক নিলম্বন কৰাৰ কোনো নিয়ম আম আদমী পাৰ্টীত নাই ৷ আপৰ ৰাজ্যিক উপ-সভাপতিক নিলম্বন কৰিবৰ বাবে কেন্দ্ৰীয় সমিতিৰ অনুমোদনৰ প্ৰয়োজন ৷ এই সকলো বিলাক সাংবিধানিক নীতি-নিয়ম উলংঘা কৰি ৰাজনৈতিক আক্ৰোশৰ বাবে নিলম্বন কৰা হৈছিল ৷ আদালতে এই নিলম্বনক অসাংবিধানিক আখ্যা দি পূৰ্বৰ পদ বাহাল ৰাখিবলৈ নিৰ্দেশ দিছে ৷"
আদালতৰ এই ৰায়ক আদৰণি জনাই আদালতক ধন্যবাদ জ্ঞাপন কৰে নেতাগৰাকীয়ে ৷ এইধৰণৰ অন্যায় কাম যাতে ভবিষ্যতে আম আদমী পাৰ্টীৰ কোনো ৰাজ্যিক সভাপতি বা নেতাই নকৰে তাৰ বাবে আহ্বান জনাইছো বুলি মন্তব্য কৰে তেওঁ ৷ কাৰণ এইধৰণৰ অসাংবিধানিক কাম-কাজে দলটোৰ বহু ক্ষতি কৰি আছে, লগতে আৰু ক্ষতি কৰাৰ আশংকা ভৱিষ্যতে থাকি যাব ৷ লগতে তেওঁ কয় যে, অন্যায় কৰি কেতিয়াও ৰাজনীতিত জিকিব নোৱাৰি ৷
উল্লেখ্য যে 'তিনি গগৈ’ বিতৰ্ক সন্দৰ্ভত কৰা মন্তব্যৰ বাবে আম আদমি পাৰ্টী দলটোৱে তাৎক্ষণিকভাৱে কাৰ্যকৰী হোৱাকৈ ৪ জুলাইৰ দিনা নিলম্বন কৰিছিল দলটোৰ নেতা কমল কুমাৰ মেধিক ৷ দলটোৰ ৰাজ্যিক সভাপতি ভৱেন চৌধুৰীৰ স্বাক্ষৰ সম্বলিত এক পত্ৰযোগে নিলম্বনৰ বিষয়ে অৱগত হৈছিল কমল কুমাৰ মেধি ৷ কাৰণ দৰ্শোৱা পৰ্যন্ত কোনো সুযোগ প্ৰদান নকৰা দলটোৰ এই সিদ্ধান্তৰ পিছতে কমল কুমাৰ মেধিয়ে দলটোৰ বিৰুদ্ধে সোচ্চাৰ হোৱা পৰিলক্ষিত হৈছিল ৷ তাৰ পিছতে ন্যায় বিচাৰি আদালতৰ কাষ চাপিছিল কমল কুমাৰ মেধি ৷
লগতে পঢ়ক : Oil Palm Tree Plantation: অসমত কিয় প্ৰয়োজন তৈল খেজুৰৰ খেতি,আপ নেতাৰ প্ৰশ্ন
