গুৱাহাটী, ২৯ মে’: "লুৰীণজ্যোতি গগৈ মোৰ কাৰণে সদায় ৰাম হৈ থাকিব । মই লক্ষ্মণ হৈ যুঁজিছিলো নোৱাৰিলোঁ । আধা বাটতে থাকি গ’লো । ৰাম জয়ী হোৱাটো বিচাৰিছো । তেওঁ জয়ী হৈ আহিব ।" লুৰীণজ্যোতি গগৈক ৰাম আখ্যা দি এনেদৰে ক’লে অসম জাতীয় পৰিষদ ত্যাগ কৰা চিত্তৰঞ্জন বসুমতাৰীয়ে (Chittaranjan Basumatary on Lurinjyoti Gogoi)৷
দল ত্যাগৰ ৪৮ ঘন্টাৰ পাছত তেওঁ প্ৰতিক্ৰিয়া প্ৰকাশ কৰি কয়, ‘‘জাতীয়তাবাদ আছে, আছিল আৰু ভৱিষ্যতেও থাকিব । অসম মোৰ বাবে আৰু মই অসমৰ বাবে সদায় থাকিম ।’’ দলৰ বিশৃংঙ্খলতাবোৰ লুৰীণজ্যোতি গগৈয়ে দূৰ কৰিব বুলি আশাবাদী চিত্তৰঞ্জন বসুমতাৰী । জাতীয়তাবাদ প্ৰতিষ্ঠা, অসমত সুস্থ পৰিৱেশ ৰচনা, সুস্থ মূল্যবোধৰ ৰাজনীতি কৰাত লুৰিণজ্যোতিক সহায় কৰিবলৈ ৰাইজক আহ্বান জনায় তেওঁ কয়, ‘‘অসমৰ বাবে কাম কৰি যাম । মই মোৰ স্থিতিত মই অটল আছোঁ । অৰাজনৈতিকভাৱে থাকিব বিচাৰিছো । ৰাজনীতিৰ পৰা মুক্ত হ’ব বিচাৰিছো ।’’
উল্লেখ্য যে, অসম জাতীয় পৰিষদৰ সম্পাদক চিত্তৰঞ্জন বসুমতাৰীয়ে দল ত্যাগ কৰা সন্দৰ্ভত অসম জাতীয় পৰিষদৰ সভাপতিলৈ শুকুৰবাৰে পদত্যাগ পত্ৰ প্ৰেৰণ কৰিছিল । দলটোৰ সাংগঠনিক কাম-কাজত ক্ষুদ্ধ হৈ চিত্তৰঞ্জন বসুমতাৰীয়ে দল ত্যাগ কৰা বুলি পত্ৰযোগে জানিবলৈ দিছিল (Chittaranjan Basumatary quits AJP)।
অসম জাতীয় পৰিষদ গঠনৰ ক্ষেত্ৰত চিত্তৰঞ্জন বসুমতাৰীৰ এক অন্যতম ভূমিকা আছিল । ২০২১ চনত বিধানসভা নিৰ্বাচনত ধেমাজি সমষ্টিৰ পৰা অসম জাতীয় পৰিষদৰ হৈ চিত্তৰঞ্জন বসুমতাৰী নিৰ্বাচনত অৱতীৰ্ণ হৈছিল । সেই নিৰ্বাচনত বিজেপিৰ প্ৰাৰ্থীৰ হাতত পৰাজয় বৰণ কৰা চিত্তৰঞ্জন বসুমতাৰী আছিল দ্বিতীয় স্থানত । চিত্তৰঞ্জন বসুমতাৰী ২০২১ চনৰ বিধানসভা নিৰ্বাচনত অসম জাতীয় পৰিষদৰ সৰ্বাধিক ভোট লাভ কৰা প্ৰাৰ্থী আছিল । মাজুলী বিধানসভাৰ উপ-নিৰ্বাচনত তেওঁ বিৰোধী দলৰ উমৈহতীয়া প্ৰাৰ্থী হিচাপে প্ৰতিদ্বন্দিতা আগবঢ়ায় যদিও বিজেপিৰ প্ৰাৰ্থীৰ হাতত পৰাজয় বৰণ কৰে ।
আনহাতে পীয়ুষ হাজৰিকাই চিত্তৰঞ্জন বসুমতাৰীৰ দলত্যাগৰ সন্দৰ্ভত কৰা মন্তব্যৰ প্ৰতিক্ৰিয়া প্ৰকাশ কৰি তেওঁ কয় যে, পীযুষ হাজৰিকা আৰু লুৰীণজ্যোতি গগৈ কোনো প্ৰকাৰে নিমিলে ৷ পীযুষ হাজৰিকাৰ দৰে লুৰীণজ্যোতি গগৈয়ে তৰল মন্তব্য নকৰে ৷ পীযুষ হাজৰিকাই বাল্মিকী হোৱাৰ চেষ্টা কৰিছে (Chittaranjan Basumatary on Pijush Hazarika)৷
লগতে পঢ়ক: Assam Cabinet Decision: অসম আন্দোলনৰ নিৰ্যাতিতলৈ আগবঢ়াব ২ লাখ টকাকৈ এককালীন সাহায্য
