গুৱাহাটী, ১৮ মে': লক ডাউনৰ সময়চোৱাত ৰাষ্ট্ৰীয় খাদ্য সুৰক্ষা আচনিৰ কাৰ্ড নথকা লোকসকলক এহেজাৰ টকাকৈ আদায় দিবলৈ ৰাজ্য চৰকাৰে সিদ্ধান্ত লৈছিল । কিন্তু ৰাজ্যৰ বিভিন্ন অঞ্চলত এই ধন প্ৰদানৰ নামত সংঘটিত হৈছিল বৃহৎ কেলেংকাৰী । এই কথা পোহৰলৈ অহাত সোমবাৰ মুখ্যমন্ত্ৰী সৰ্বানন্দ সোণোৱালে ইয়াৰ এক তাৎক্ষণিক তদন্ত কৰিবলৈ নিৰ্দেশ দিয়ে জিলা উপায়ুক্ত সকলক । লগতে যিসকল চৰকাৰী বিষয়া-কৰ্মচাৰী এই কেলেংকাৰীৰ সৈতে জড়িত তেওলোকৰ বিৰুদ্ধেও ব্যৱস্থা গ্ৰহণৰ বাবে নিৰ্দেশ দিয়ে মুখ্যমন্ত্ৰীয়ে ।
উল্লেখ্য যে, সোমবাৰে মুখ্যমন্ত্ৰীয়ে জনতা ভৱনৰ পৰা ৰাজ্যৰ উপায়ুক্ত সকল, জিলা পৰিষদৰ মুখ্য কাৰ্যবাহী বিষয়া, জিলা উন্নয়ন আয়ুক্ত আৰু খণ্ড উন্নয়ন বিষয়াসকলৰ সৈতে এক ভিডিঅ' কনফাৰেঞ্চত ভাগ লয় । মুখ্যমন্ত্ৰীয়ে চতুৰ্দশ বিত্তীয় আয়োগৰ অধীনৰ বিভিন্ন আচনিৰ কামকাজ আগন্তুক তিনি মাহৰ ভিতৰত সম্পূৰ্ণ কৰিবলৈও নিৰ্দেশ দিয়ে । এই কামৰ খতিয়ান প্ৰতি দহ দিনৰ মুৰে মুৰে খণ্ড উন্নয়ন বিষয়াসকলে উপায়ুক্তক দাখিল কৰিব লাগিব ।
আনহাতে, প্ৰব্ৰজিত শ্ৰমিকসকলক শীঘ্ৰে এনৰেগাৰ অধীনত কামত নিয়োগ কৰিবলৈও ভিডিঅ' কনফাৰেঞ্চত মুখ্যমন্ত্ৰীয়ে নিৰ্দেশ দিয়ে । চৰকাৰৰ কোনো এখন আঁচনিৰ নামত যাতে কোনোধৰণৰ বিসংগতি নঘটে তাৰ প্ৰতি চোকা দৃষ্টি ৰাখিবলৈ উপায়ুক্ত সকলক নিৰ্দেশ দিয়ে মুখ্যমন্ত্ৰী সোণোৱালে ।
