নিউজ ডেস্ক, 23 জানুৱাৰীঃ আজি নেতাজী সুভাস চন্দ্ৰ বসুৰ ১২৩ তম জন্ম জয়ন্তী ৷ সমগ্ৰ দেশৰ সমান্তৰালকৈ অসমৰো ভিন্ন প্ৰান্তত পালন কৰা হয় স্বাধীনতা সংগ্ৰামী বীৰ গৰাকীৰ জন্ম জয়ন্তী ৷ সেই উপলক্ষে আজি মহানগৰীৰ মালিগাঁওস্থিত নেতাজী বিদ্যাপীঠ ৰে'লৱে উচ্চতৰ মাধ্যমিক বিদ্যালয়ত অনুষ্ঠিত কৰা হৈছে বিশেষ অনুষ্ঠানৰ ৷ নেতাজীৰ জীৱনৰ বিষয়ে ছাত্ৰ-ছাত্ৰীক বিতংভাৱে অৱগত কৰিবলৈ এক আলোচনা চক্ৰৰো আয়োজন কৰে বিদ্যালয় খনত ৷
বাক্সাঃ বাক্সাৰ কুমাৰীকাটা আঙাৰকাটাৰ পলাশবাৰীতো দিনজোৰা কাৰ্যসূচীৰে পালন কৰা হয় বিশ্ব বৰণ্য ব্যক্তিগৰাকীৰ জন্ম জয়ন্তী ৷ পলাশবাৰীৰ নেতাজী যুৱক সংঘৰ সৌজন্যত বৃহৎ সাংস্কৃতিক শোভাযাত্ৰা উলিয়াই, স্থানীয় লোকসকলৰ সহযোগত অনুষ্ঠিত কৰে এখন মুকলি সভা ৷
বিলাসীপাৰাঃ বিলাসীপাৰাতো সদৌ অসম বঙালী যুৱ ফেডাৰেশ্যন বিলাসীপাৰা আঞ্চলিক কমিটি আৰু মিলন সংঘৰ সহযোগত, দিনজোৰা বিভিন্ন কাৰ্যসূচীৰে উদযাপন কৰিলে নেতাজীৰ ১২৩ তম জন্ম জয়ন্তী ৷ বিলাসীপাৰাত নেতাজীৰ জন্ম জয়ন্তী উপলক্ষে উলিওৱা শোভাযাত্ৰাৰ আনুষ্ঠানিক ভাৱে উদ্বোধন কৰে, মহকুমাধিপতি মাননীয় মৃদুল যাদৱ দেৱে ৷
ধুবুৰীঃ ইয়াৰ সমান্তৰালকৈ ধুবুৰীটো নেতাজীৰ ১২৩ তম জন্ম জয়ন্তী উপলক্ষে ধুবুৰী চহৰৰ নেতাজী মোৰত, অৱস্থিত নেতাজীৰ প্ৰতিমূৰ্তিত পতাকা উত্তোলন কৰি এক চিত্ৰাংকণ প্ৰতিযোগিতা অনুষ্ঠিত কৰা হয় ৷ এই কাৰ্যসূচীত উদযাপন সমিতিৰ লগতে জিলা অতিৰিক্ত উপায়ুক্ত অনিমেশ তালুকদাৰৰ সৈতে কেইবাগৰাকীও বিশিষ্ট ব্যক্তি উপস্থিত থাকে ৷
ফকিৰাগ্ৰামঃ সদৌ বিটিচি বেংগলী যুৱ ছাত্ৰ পৰিষদ কোকৰাঝাৰ জিলা সমিতি আৰু ফকিৰাগ্ৰাম আঞ্চলিক সমিতিৰ যৌথ উদ্যোগত ফকিৰাগ্ৰামতো নেতাজী সুভাষ চন্দ্ৰ বসুৰ জন্ম জয়ন্তী পালন কৰা হয় ৷ জন্ম জয়ন্তী উপলক্ষে ফকিৰাগ্ৰামত শোভাযাত্ৰাৰ উলিওৱাৰ লগতে অনুষ্ঠিত কৰে এখন মুকলি সভা ৷
শিলচৰঃ পিছ পৰি নৰ'ল শিলচৰ চহৰো ৷ শিলচৰ চহৰতো উছাহেৰে পালন কৰা হৈছে নেতাজী সুভাষ চন্দ্ৰ বসুৰ 123 তম জন্ম জয়ন্তী ৷ নেতাজীৰ জন্ম জয়ন্তী উপলক্ষে শিলচৰৰ সকলো বিদ্যালয়ৰ ছাত্ৰ-ছাত্ৰী সকলে পেৰেড কৰি চহৰৰ প্ৰধান পথসমূহ পৰিক্ৰমা কৰে ৷ অনুষ্ঠানৰ পতাকা উত্তোলন কৰে প্ৰাক্তন কেন্দ্ৰীয় মন্ত্ৰী কবীন্দ্ৰ পুৰকায়স্থই ৷
এনেদৰে আজি ৰাজ্যৰ ভিন্ন স্থানত ভিন্ন কাৰ্যসূচীৰে পালন কৰা হয় নেতাজী চন্দ্ৰৰ বসু 123 তম জন্ম জয়ন্তী ৷
লগতে পঢ়ক ঃ শুৱালকুচিত সাহিত্য সভাৰ অধিৱেশনস্থলী পৰিদৰ্শন অতিৰিক্ত আৰক্ষী মহাপৰিদৰ্শকৰ
