গুৱাহাটী, ১১ নৱেম্বৰ : গুৱাহাটী উচ্চ ন্যায়ালয়ত বৃহস্পতিবাৰে পুৱা উপস্থিত হয় বিজেপিৰ প্ৰবীণ নেতা ড৹ সুব্ৰমণিয়ম স্বামী । নিজৰ এক পুৰণি গোচৰ সংক্ৰান্তত গুৱাহাটী উচ্চ ন্যায়ালয়ত উপস্থিত হয় সুব্ৰমণিয়ম স্বামী । কংগ্ৰেছৰ দিনত তেওঁৰ বিৰুদ্ধে তৰা পুৰণি গোচৰ এটাৰ প্ৰত্যাহ্বান জনাই উচ্চ ন্যায়ালয়ত স্বামীয়ে নিজেই তৰিছিল এক গোচৰ । স্বামীৰ বিৰুদ্ধে তৰা এই গোচৰ মীমাংসাৰ বাবে উচ্চতম ন্যায়ালয়ে প্ৰেৰণ কৰিছিল উচ্চ ন্যায়ালয়লৈ । ন্যায়াধীশ মণীষ চৌধুৰীৰ আদালতত সম্পন্ন হৈছে এই বিচাৰ প্ৰক্ৰিয়া ।
ন্যায় প্ৰক্ৰিয়া সমাপন হোৱাৰ পাছত ন্যায়ালয়ৰ চৌহদত স্বামীয়ে কয় যে, গোচৰৰ ৰায় সংৰক্ষিত আছে । এতিয়া তেওঁৰ কৰিবলগীয়া একো নাই । কংগ্ৰেছৰ শাসনকালতে বিজেপিৰ প্ৰবীণ নেতাগৰাকীৰ বিৰুদ্ধে তৰা হৈছিল এই গোচৰ । ২০১৫ চনত মছজিদৰ সম্পৰ্কত বিতৰ্কিত মন্তব্য কৰা বুলি স্বামীৰ বিৰুদ্ধে অভিযোগ উঠিছিল । উক্ত প্ৰসংগক লৈয়ে গুৱাহাটী উচ্চ ন্যায়ালয়ত দাখিল কৰা এক লেখ আবেদনৰ ভিত্তিত ৰুজু হোৱা গোচৰৰ প্ৰত্যাহ্বান জনাই তেওঁ উপস্থিত হৈছিল ন্যায়ালয়ত ।
ৰাজ্যিক বিজেপিৰ বৃহৎ সংখ্যক নেতাৰ সৈতে ন্যায়ালয়লৈ অহা শীৰ্ষ নেতা তথা প্ৰাক্তন কেন্দ্ৰীয় মন্ত্ৰীগৰাকী শুনানী পৰ্ব ইতিমধ্যে সম্পন্ন হৈছে যদি ন্যায়ালয়ে ইয়াৰ ৰায় সংৰক্ষিত ৰাখিছে । বিৰ্তকিত মন্তব্যৰ বাবে ২০১৯ চনতো শিলচৰ আদালতত হাজিৰ হৈছিল বিজেপিৰ প্ৰবীণ নেতাগৰাকী । ইফালে সাংবাদিকৰ আগত চীনৰ শেহতীয়া কাৰ্য দেখি ভাৰত চৰকাৰক কঠোৰ হ’বলৈ আহ্বান জনাই প্ৰবীণ বিজেপি নেতাগৰাকীয়ে ।
অৰুণাচলৰ মাটি চীনে দখল কৰা প্ৰসংগকলৈ তেওঁ কয় যে অৰুণাচলৰ পৰা চীনক খেদি পঠাব লাগে । প্ৰতিৰক্ষা মন্ত্ৰী ৰাজনাথ সিঙক সাক্ষাৎ কৰি তেওঁ চীনৰ বিৰুদ্ধে কঠোৰ হ'বলৈ কোৱাৰ প্ৰসংগও উল্লেখ কৰে ।
লগতে পঢ়ক : নতুন পাঁচগৰাকী বিধায়কক শপত বাক্য পাঠ কৰোৱালে অধ্যক্ষ বিশ্বজিৎ দৈমাৰীয়ে
