গুৱাহাটী, 31 মে’: অহা 14 জুনত কাৰ্যকাল উকলিব অসমৰ দুই ৰাজ্যসভাৰ সাংসদ প্ৰাক্তন প্ৰধানমন্ত্ৰী মনমোহন সিং আৰু শান্তিয়াজ কুজুৰৰ । 14 জুনত খালী হ'ব লগা ৰাজ্যসভাৰ আসন দুখনৰ বাবে বিজেপি দলৰহৈ কামাখ্যা প্ৰসাদ তাছা আৰু বিজেপি মিত্ৰজোঁটৰ হৈ অগপৰ বীৰেন্দ্ৰ প্ৰসাদ বৈশ্যই দাখিল কৰিছিল মনোনয়ন । শুকুৰবাৰে মনোনয়ন পত্ৰৰ আছিল অন্তিমটো দিন ৷ সেই অনুসৰি দুয়োগৰাকী প্ৰাৰ্থীৰ বিৰুদ্ধে প্ৰাৰ্থী থিয় কৰোৱা নাছিল কংগ্ৰেছৰ লগতে অন্য বিৰোধী দলে । যাৰ বাবে বীৰেন্দ্ৰ প্ৰসাদ বৈশ্য আৰু কামাখ্যা প্ৰসাদ তাছাৰ বিৰুদ্ধে প্ৰাৰ্থী নথকাৰ বাবে নিৰ্বাচনী বিষয়াই দুয়োগৰাকী প্ৰাৰ্থীকে বিনা প্ৰতিদ্বন্দিতাই বিজয় ঘোষণা কৰে ।
নিৰ্বাচনী বিষয়াই বীৰেন্দ্ৰ প্ৰসাদ বৈশ্য আৰু কামাখ্যা প্ৰসাদ তাছাক বিজয় ঘোষণা কৰি শুকুৰবাৰে মিত্ৰজোঁটৰ প্ৰাৰ্থী বীৰেন্দ্ৰ প্ৰসাদ বৈশ্যক বিজয় পত্ৰ প্ৰদান কৰে । অগপ দলৰ সভাপতি তথা মিত্ৰজোঁটৰ মন্ত্ৰী অতুল বৰাই বীৰেন্দ্ৰ প্ৰসাদ বৈশ্যক শুভেচ্ছা জ্ঞাপন কৰে যদিও কেব লৈ সাংসদত বীৰেন্দ্ৰ প্ৰসাদ বৈশ্যৰ স্থিতি কি হ'ব বুলি সাংবাদিকে কৰা প্ৰশ্নত কোনোধৰণৰ মন্তব্য প্ৰদান কৰাৰ পৰা বিৰত থাকে বীৰেন্দ্ৰ প্ৰসাদ বৈশ্য ৷
মিত্ৰজোঁটৰ দল অগপৰ বিজয় প্ৰাৰ্থী বীৰেন্দ্ৰ প্ৰসাদ বৈশ্যই আজি নিৰ্বাচনী বিষয়াৰ পৰা বিজয় পত্ৰ গ্ৰহণ কৰে যদিও বিজেপিৰ প্ৰাৰ্থী কামাখ্যা প্ৰসাদ তাছাই কাইলৈ অৰ্থাৎ শনিবাৰে পত্ৰ গ্ৰহণ কৰিব । কংগ্ৰেছ দলে বিধানসভাত তেওঁলোকৰ মাত্ৰ 25 খন আসন থকাৰ বাবে ৰাজ্যসভাত প্ৰাৰ্থী প্ৰদান নকৰিলে ।
