নিউজ ডেস্ক, 22 জুন: মহাৰাষ্ট্ৰৰ চৰকাৰ ভঙাপতাৰ ৰাজনীতিয়ে ইতিমধ্যে অসমকো স্পৰ্শ কৰাৰ পিছত ৰাজ্যৰ ৰাজনীতিতো জোকাৰণিৰ সৃষ্টি কৰিছে ৷ কিয়নো অসমৰ বিজেপি শাসিত চৰকাৰখনে ইতিমধ্যে মহাৰাষ্ট্ৰৰ পৰা আহি পোৱা বিসম্বাদী বিধায়কৰ দলটোক গুৱাহাটীৰ হোটেল ৰেডিছন ব্লুত ৰাজকীয় আতিথ্যৰে ৰখাৰ ব্যৱস্থা কৰিছে (Maharashtra MLAs in Guwahati) ৷
বিজেপি সাংসদ পল্লৱলোচন দাস আৰু বিধায়ক সুশান্ত বৰগোঁহাইক বিশেষভাবে এই বিসম্বাদী বিধায়কৰ দলটোক আলপৈচান ধৰাৰ বাবে বিশেষভাবে দায়িত্ব দিয়া হৈছে ৷ স্বাভাৱিকতে মহাৰাষ্ট্ৰৰ পৰা আহি গুৱাহাটীত বাহৰ পতা এই বিসম্বাদী বিধায়কৰ দলটোক লৈ ব্যস্ত হৈ পৰিছে অসমৰ বিজেপি দল আৰু চৰকাৰ ৷ আনহাতে অসমৰ ৰাজ্য চৰকাৰখন এইদৰে মহাৰাষ্ট্ৰৰ বিসম্বাদী বিধায়কক লৈ ব্যস্ত হৈ পৰা কাৰ্যত প্ৰতিক্ৰিয়া প্ৰকাশ কৰিছে প্ৰদেশ কংগ্ৰেছৰ সভাপতি ভূপেন বৰাই ৷
প্ৰদেশ কংগ্ৰেছৰ সভাপতিগৰাকীয়ে এক টুইট যোগে কয়- " মহাৰাষ্ট্ৰৰ বিধায়কক ৰাজআতিথ্য দিয়াৰ সামৰ্থ আছে, কিন্তু লাখ লাখ বানাক্ৰান্ত ৰাইজৰ আৰ্তনাদ আৰু দুখীয়াৰ চকুলো মচিবলৈ সম্পূৰ্ণ অসমৰ্থ অসমৰ মুখ্যমন্ত্ৰী " (Bhupen Borah tweets on Maharashtra political crisis) ৷
লগতে পঢ়ক: MAHA politcal drama : ৰেডিচন ব্লুৰ কোঠাত মহাৰাষ্ট্ৰ চৰকাৰৰ ভৱিষ্যৎ পৰিকল্পনা !
