গুৱাহাটী, 14 জুলাই : বতৰ বিজ্ঞান কেন্দ্ৰই শুকুৰবাৰে সদৰি কৰা মতে অহা ২৪ ঘণ্টাত অসমৰ জিলাসমূহৰ সকলোবোৰ ঠাইতে বিজুলী ঢেৰেকণি সহ পাতলীয়াৰ পৰা মজলীয়া বৰষুণ হোৱাৰ সম্ভাৱনা আছে । লগতে ঠায়ে ঠায়ে বজ্ৰপাতৰ সৈতে প্ৰৱল বৰষুণৰ সৈতে নামনি অসমৰ দুই এঠাইত অতি প্ৰৱল বৰষুণ হোৱাৰ সম্ভাৱনা আছে ৷
বতৰ বিজ্ঞান কেন্দ্ৰই প্ৰকাশ কৰা মতে, বিগত ২৪ ঘণ্টাত অসমৰ প্ৰায় সকলো ঠাইতে বিজুলী ঢেৰেকণি সহ পাতলীয়াৰ পৰা মজলীয়া বৰষুণ হোৱাৰ লগতে নামনি অসমৰ দুই এঠাইত প্ৰৱল বৰষুণ হৈছিল । ৰাজ্যখনৰ যোৱাকালিৰ সৰ্বাধিক সৰ্বোচ্চ তাপমাত্ৰা গুৱাহাটীত ৩৩.৯৹ ছেলছিয়াছ ৰেকৰ্ড হৈছিল ।
আনহাতে ৰাজ্যত পুনৰ আৰম্ভ হৈছে বানৰ দ্বিতীয়টো ঢৌ । কেইবাখনো নৈ-উপনৈৰ জলস্তৰে বিপদসীমা অতিক্ৰম কৰিছে । সম্প্ৰতি ৰাজ্যৰ দহখন জিলাৰ ডেৰ শতাধিক গাঁৱৰ ৪১ সহস্ৰাধিক জনসংখ্যা বানৰ কৱলত পৰিছে । অসম ৰাজ্যিক দুৰ্যোগ ব্যৱস্থাপনা প্ৰাধিকৰণে জনোৱা মতে, সম্প্ৰতি বিশ্বনাথ, বঙাইগাঁও, চিৰাং, ধেমাজি, কোকৰাঝাৰ, মাজুলী, নলবাৰী, তামুলপুৰ আৰু তিনিচুকীয়া জিলাৰ ১৯ টা ৰাজহ চক্ৰৰ ১৭৯ খন গাঁও বানৰ কৱলত পৰিছে ।
বানৰ ফলত প্ৰভাৱিত হৈছে ৪১,২৮৫ লোক, বুৰ গৈছে ২২১১ হেক্টৰ কৃষিভূমি । চিৰাঙত ১১টা আশ্ৰয় শিবিৰত ২৬৭১ বন্যার্তই আশ্ৰয় লৈ আছে । চিৰাঙৰ ৪৬খন গাঁও বানৰ কৱলত পৰিছে । আনহাতে, অধিক বান প্ৰভাৱিত আন জিলাকেইখন হ’ল— ধেমাজি, বিশ্বনাথ, মাজুলী, ডিব্ৰুগড় আৰু বঙাইগাঁও ৷ ইয়াৰে ধেমাজিৰ ৫১খন গাঁও, বিশ্বনাথৰ ২২খন গাঁও, মাজুলীৰ ১৯খন গাঁও, ডিব্ৰুগড়ৰ ১৭খন গাঁও আৰু বঙাইগাঁৱৰ ১৬খন গাঁও বানত বুৰ গৈ আছে ।
লগতে পঢ়ক : Chirang flood update: চিৰাঙত বানাক্ৰান্ত ৰাইজৰ বিলৈ
