গুৱাহাটী, ৯ মে’ : বহু বিবাহ কৰোৱাসকলৰ বাবে শীঘ্ৰেই আহি আছে বিপদ ৷ বহু বিবাহৰ বিৰুদ্ধে কঠোৰ হ’ব অসমৰ হিমন্ত বিশ্ব শৰ্মা চৰকাৰ ৷ হিমন্ত বিশ্ব শৰ্মা চৰকাৰে অহা ছমাহৰ ভিতৰত ৰাজ্যত বহু বিবাহ নিষিদ্ধ কৰিব বুলি ঘোষণা কৰে (Assam govt Strict action against polygamy) ৷ আজি দুটা বছৰ সম্পূৰ্ণ কৰিলে মুখ্যমন্ত্ৰী ড৹ হিমন্ত বিশ্ব শৰ্মা নেতৃত্বাধীন বিজেপি মিত্ৰজোঁটৰ চৰকাৰে (2nd anniversary of Himanta Biswa Sarma govt) ৷
এখন বিশেষজ্ঞ কমিটীৰ পৰামৰ্শ অনুসৰি বহু বিবাহ নিষিদ্ধ কৰাৰ উদ্দেশ্যৰে আইন আনিব অসম চৰকাৰে (Strict action against polygamy)। মুছলিম ব্যক্তিগত আইন (শ্বৰিয়ত) আইনৰ বিধানসমূহো ফঁহিয়াই পৰ্যালোচনা কৰিব কমিটীখনে ৷
বৰ্তমানৰ বিজেপি মিত্ৰজোঁটৰ চৰকাৰখনৰ দ্বিতীয় বৰ্ষপবৰ্তি উপলক্ষে সংবাদ মাধ্যমৰ সৈতে মঙলবাৰে কইনাধৰাত এক মত বিনিময় অনুষ্ঠানত ভাগ লয় মুখ্যমন্ত্ৰী ড৹ হিমন্ত বিশ্ব শৰ্মাই ৷ এই অনুষ্ঠানতে মুখ্যমন্ত্ৰী শৰ্মাই ঘোষণা কৰে যে, ৰাজ্যত বহুবিবাহ নিষিদ্ধ কৰাৰ আইনী ব্যৱস্থা তথা সুবিধা-অসুবিধাসমূহ পৰ্যালোচনা কৰিবলৈ কাইলৈৰ ভিতৰত অসম চৰকাৰে এখন বিশেষ কমিটী গঠন কৰিব ।
বাল্য বিবাহৰ বিৰুদ্ধে যোৱা ফেব্ৰুৱাৰী মাহত অসম চৰকাৰে ৰাজ্যজুৰি ব্যাপক অভিযান আৰম্ভ কৰিছিল ৷ ৪০০০ তকৈয়ো অধিক গোচৰ ৰুজু হোৱাৰ লগতে সমসংখ্যক লোক গ্ৰেপ্তাৰো হৈছিল ৷ তেতিয়াই এটা কথা পোহৰলৈ আহিছিল যে, ৰাজ্যখনত বাল্য বিবাহৰ দৰেই বৃহৎ সংখ্যক বহু বিবাহৰ ঘটনাও ঘটি আহিছে ৷ সেয়ে চৰকাৰে বহু বিবাহ বন্ধ কৰিবৰ বাবে এখন আইন অনাৰ চিন্তা কৰিবলগীয়া হয় ৷
বহুবিবাহ নিষিদ্ধ কৰাৰ অধিকাৰ ৰাজ্য চৰকাৰৰ আছে নে নাই তাক পৰীক্ষা কৰিবলৈ অসম চৰকাৰে বিশেষজ্ঞ কমিটীখন গঠন কৰাৰ সিদ্ধান্ত লোৱা হৈছে বুলি মুখ্যমন্ত্ৰী হিমন্ত বিশ্ব শৰ্মাই প্ৰকাশ কৰে । এই সমিতিখনে ভাৰতৰ সংবিধানৰ ২৫ নং অনুচ্ছেদৰ লগতে ১৯৩৭ চনৰ মুছলীম ব্যক্তিগত আইন (শ্বৰিয়ত) আইনৰ বিধানসমূহো পৰ্যালোচনা কৰিব । এই সম্পৰ্কত কমিটীখনে তন্ন তন্নকৈ পৰীক্ষা কৰিব । এই কমিটীখনে আইনী বিশেষজ্ঞকে ধৰি সকলো পৰ্যায়ৰ প্ৰতিনিধিৰ সৈতে বিস্তৃত আলোচনা কৰি এক সৰ্বসন্মত সিদ্ধান্তত উপনীত হ’ব ।
“অসমীয়া ভাষী মুছলমানসকলৰ মাজত এনে বহুবিবাহৰ প্ৰচলন অতি কম । কিন্তু প্ৰব্ৰজিত ভাষিক মুছলমান সকলৰ মাজত বহুবিবাহ বেছিকৈ দেখা পোৱা গৈছে । বৰাক উপত্যকাৰ বহু অঞ্চল, হোজাই, যমুনামুখ আদি স্থানত এগৰাকী ব্যক্তিয়ে কেইবাগৰাকী মহিলাক বিয়া কৰোৱাৰ পৰম্পৰা কিছু অধিক ৷” এইদৰে উল্লেখ কৰে মুখ্যমন্ত্ৰীগৰাকীয়ে ৷
মুখ্যমন্ত্রীগৰাকীয়ে লগতে উল্লেখ কৰে যে অসমৰ কোনো কোনো জনজাতীয় সমাজতো বহুবিবাহৰ ঘটনা দেখা পোৱা যায় ৷ শেহতীয়াকৈ বাল্যবিবাহৰ বিৰুদ্ধে চলোৱা অভিযানৰ সময়ত প্ৰব্ৰজিত মুছলমান বসতি প্ৰধান অঞ্চলত 60 ৰ পৰা 65 বছৰীয়া লোকেও বহুবিবাহ কৰা দেখা যায় ৷ বৃদ্ধলোকেও সৰু ছোৱালীক বিয়া কৰায় ৷ অভিজ্ঞ আইনজ্ঞৰ দ্বাৰা গঠিত হ’বলগীয়া কমিটীখনে মুছলমান নেতাসকলৰ সৈতেও এই বিষয়ত আলোচনা কৰিব ৷
লগতে ইছলামিক ধৰ্মগুৰুসকলৰ সৈতেও আলোচনা কৰিব যাতে বহুবিবাহৰ বিৰুদ্ধে আইন প্ৰণয়ন কৰিবলৈ যাওতে শ্বৰিয়তৰ সৈতে কোনো ধৰণৰ বিৰোধ নহয় ৷ মুখ্যমন্ত্ৰী শৰ্মাই উল্লেখ কৰে যে তেওঁ যোৱা ৭ দিনত ইছলামিক আইন অতি সতৰ্কতাৰে অধ্যয়ন কৰিছে ৷ ইছলামিক আইন অনুসৰি বহুবিবাহ অত্যাৱশ্যকীয় প্ৰথা নহয় ।
লগতে পঢ়ক: 2nd anniversary of Himanta govt: দুবছৰৰ শাসনকালত কি কি কৰিলে হিমন্ত বিশ্ব শৰ্মাৰ চৰকাৰে ?
