গুৱাহাটী, ১৮ ফেব্ৰুৱাৰী : ঋণ ওপৰত ঋণ লৈ যেন অভিলেখ সৃষ্টি কৰিব বিচাৰিছে মুখ্যমন্ত্রী হিমন্ত বিশ্ব শৰ্মা নেতৃত্বাধীন চৰকাৰখনে । ঋণ লোৱাৰ ক্ষেত্রত অলপো কৃপনালি নকৰা চৰকাৰখনে চলিত বৰ্ষৰ আৰম্ভণিৰ ডেৰ মাহতে ৩২০০ কোটি টকাৰ ঋণ ল'লে । বিত্তীয় সংকটৰ জোৰা মৰাৰ বাবে মাহে মাহে ঋণ ল’বলৈ বাধ্য হৈছে ৰাজ্য চৰকাৰ (Himants Biswa Sarma govt taking largest amount of loan) । ইফালে ঋণ-ধাৰ কৰি ৰাজ্য চলোৱা হিমন্ত বিশ্ব শৰ্মা চৰকাৰে কিন্তু ভোটৰ অংকত এখনো হিতাধিকাৰী আঁচনি বন্ধ কৰা নাই ।
বৰং হিতাধিকাৰী বৃদ্ধিত অধিক গুৰুত্ব আৰোপ কৰাহে দেখিবলৈ পোৱা গৈছে । আনহাতে, প্রতিমাহে বৃহৎ অংকৰ ধন ঋণ হিচাপে লোৱাৰ ফলত ৰাজ্যবাসীৰ ওপৰত ধাৰৰ বোজাও ক্ৰমাৎ বৃদ্ধি পোৱা দেখিবলৈ পোৱা গৈছে । শেহতীয়াকৈ ১৪ ফেব্ৰুৱাৰীত ৮০০ কোটি টকাৰ ঋণ লৈছে ৰাজ্য চৰকাৰখনে । ইয়াকে ধৰি নতুন বৰ্ষটোৰ প্ৰথম ডেৰ মাহতে ৰাজ্য চৰকাৰখনে ল’লে মুঠ ৩২০০ কোটি টকাৰ ঋণ (Assam Govt in Debt) ।
লক্ষণীয় বিষয় যে বিজেপি চৰকাৰৰ দিনত ৰাজ্যখনে অভাৱনীয় হাৰত ঋণৰ বোজা বহন কৰিবলগীয়া হৈছে (Financial crisis of Assam Govt) । উল্লেখ্য যে তৰুণ গগৈৰ চৰকাৰৰ দিনত ৰাজ্যখনৰ ঋণৰ পৰিমাণ আছিল ৩৫,৬৯০ কোটি টকা । কিন্তু ইয়াৰ পাছত ৰাজ্যত বিজেপি চৰকাৰ গঠন হোৱাৰ পৰাই ঋণ লোৱাৰ প্ৰকোপ বৃদ্ধি পায় । সৰ্বানন্দ সোণোৱালৰ দিনত যথেষ্ট পৰিমাণৰ ঋণ লোৱা হৈছিল যদিও বৰ্ত্তমান হিমন্ত বিশ্ব শৰ্মা চৰকাৰৰ আমোলত ইয়াৰ পৰিমাণ বহু বৃদ্ধি পাইছে । ঋণ লোৱাৰ ক্ষেত্ৰত পূৰ্বৰ মুখ্যমন্ত্রী সর্বানন্দ সোণোৱালকো চেৰ পেলাইছে ড° হিমন্ত বিশ্ব শৰ্মাই ।
পূৰ্বৰ মুখ্যমন্ত্ৰী সৰ্বানন্দ সোণোৱালৰ কাৰ্যকালত অসম চৰকাৰৰ দেনাৰ পৰিমাণ প্রায় ৯০ হাজাৰ কোটি টকা । কিন্তু বিগত মাৰ্চ মাহলৈকে এই ঋণৰ পৰিমাণ বৃদ্ধি পাই এক লাখ সাতহাজাৰ কোটি টকা হয় । লক্ষণীয় বিষয় যে ৰাজ্য চৰকাৰখনে অতি উচ্চহাৰৰ সুদত এই ঋণ গ্ৰহণ কৰিছে । যাৰ ফলত এই বৃহৎ অংকৰ ঋণৰ বিপৰীতে ৰাজ্য চৰকাৰখনে প্ৰতিবছৰে প্ৰায় ৮ হাজাৰ কোটি টকা সুদ ৰূপে পৰিশোধ কৰিবলগীয়া হৈছে । কিন্তু ইয়াৰ পাছতো ভোট লাভৰ স্বাৰ্থতে ব্যয় সংকোচনৰ কোনো ব্যৱস্থা হাতত লোৱা দেখিবলৈ পোৱা হোৱা নাই চৰকাৰখনে । ৰাজ্য চৰকাৰখনে নিজা ৰাজহ বৃদ্ধি কৰাৰ বাবে চেষ্টা চলাইছে যদিও এইক্ষেত্ৰত বিশেষ সফল হোৱা নাই ।
একেদৰে কেন্দ্ৰীয় চৰকাৰেও পূৰ্বতে দি থকা জি এছ টিৰ ক্ষতিপূৰণৰ ধন প্ৰদান কৰাটো বন্ধ কৰিছে । যাৰ ফলত চৰকাৰখনে আর্থিক সংকটৰ জোৰা মৰাৰ বাবে প্রতি মাহেই ঋণ ল’বলৈ বাধ্য হৈ পৰিছে । কিন্তু আশ্চর্যজনকভাৱে ইয়াৰ পাছতো চৰকাৰখনে চমকপ্রদ আঁচনি ঘোষণাত থমকি ৰোৱা নাই । সম্প্ৰতি ৰাজ্য চৰকাৰে লোৱা ঋণৰ পৰিমাণ প্রায় ১ লাখ ২৩ হাজাৰ কোটি টকাৰো অধিক হৈছেগৈ । তাৎপৰ্যপূৰ্ণ বিষয় যে এনে বৃহৎ পৰিমাণৰ ঋণৰ বোজা থকাৰ পিছতো চৰকাৰখনে হিতাধিকাৰীৰ নামত পুঁজি ব্যয় কৰাত অলপো কৃপনালি কৰা নাই ।
ইফালে চমক সৃষ্টিৰে চৰকাৰখনে লাখ লাখ টকা ব্যয় কৰি চৰকাৰী কাৰ্যসূচী পালন কৰি গৈছে । উল্লেখ্য যে, ঋণত পোত যোৱা ৰাজ্যখনত চৰকাৰে অৰুণোদয়ৰ নামতে প্ৰতিবছৰে প্ৰায় ৪১৫২ কোটি টকা ব্যয় কৰে (Arunodoi scheme)। লক্ষণীয়ভাৱে আঁচনিখনৰ হিতাধিকাৰীৰ সংখ্যাও বৃদ্ধি কৰা হৈছে । বিনামূলীয়া আঁচনি তথা হিতাধিকাৰী সৃষ্টিৰ আঁচনি বৰ্তাই ৰখাৰ নামতে চৰকাৰখনে বুজন পৰিমাণৰ পুঁজি ব্যয় কৰি আহিছে । চলিত বিত্তীয় বৰ্ষটোতে এতিয়ালৈকে ৰাজ্য চৰকাৰখনে ১৬,১০০ কোটি টকাৰ ঋণ লৈছে । আনহাতে অহা মার্চ মাহত বিত্তীয় বৰ্ষটো সমাপ্ত হোৱালৈকে চৰকাৰখনে আৰু ১৬০০ কোটি টকাৰ ঋণ ল’বলৈ মনস্থ কৰিছে ।
লগতে পঢ়ক : Moran Blind School: বিদেশী পৰ্যটকক লগত গৈ মৰাণৰ অন্ধ বিদ্যালয়ত আন্তঃৰাষ্ট্ৰীয় খ্যাতি সম্পন্ন অভিনেতা
