গুৱাহাটী, 18 জুলাইঃ প্ৰায় এসপ্তাহ ধৰি সংহাৰী বানৰ কবলত ৰাজ্যবাসী ককবকাই থকাৰ পিছত বৃহস্পতিবাৰৰ পৰা কিছু উন্নত হৈছে বান পৰিস্থিতি । যদিও বৰ্তমানে ৰাজ্যৰ 28 খন জিলাৰ 103 টা ৰাজহ চক্ৰৰ মুঠ 4128 খন গাঁও বানপানীৰ দ্বাৰা প্ৰভাৱিত হৈ আছে । তাৰ লগতে সমগ্ৰ ৰাজ্যত 53,52,107 গৰাকী ব্যক্তি বানপানীত আক্ৰান্ত হৈছে । আনহাতে যোৱা 24 ঘণ্টাত বানপানীৰ ফলত 9 গৰাকীকৈ ব্যক্তিৰ মৃত্যু হোৱাত মৃত্যুৰ সংখ্যা 37 লৈ বৃদ্ধি পাইছে আৰু ভূমিস্খলনত বৰ্তমানলৈকে 2 গৰাকীকৈ ব্যক্তিয়ে প্ৰাণ হেৰুৱাইছে ।
সাম্প্ৰতিক নেৰানেপেৰা বৰষুণৰ ফলত ওফন্দি উঠা ৰাজ্যৰ নৈ- উপনৈ সমূহৰ জলস্তৰ পূৰ্বৰ তুলনাত হ্ৰাস পাইছে যদিও ব্ৰহ্মপুত্ৰ নদীৰ জলস্তৰ যোৰহাট জিলাৰ নিমাটিঘাট, শোণিতপুৰ জিলাৰ তেজপুৰ, কামৰূপ (মহানগৰ)ৰ গুৱাহাটী, গোৱালপাৰা আৰু ধুবৰী জিলাত বিপদ সীমাৰ ওপৰেদি বৈ আছে ।
