পুনৰ সতৰ্ক সীমা অতিক্ৰম কৰিলে ব্ৰহ্মপুত্ৰৰ জলস্তৰে

গুৱাহাটী মহানগৰীত লাহে লাহে বৃদ্ধি পাবলৈ ধৰিছে ব্ৰহ্মপুত্ৰ নদীৰ জলস্তৰ । বৰ্তমান সতৰ্ক সীমাৰ ওপৰেৰে বৈছে মহানগৰীত মহাবাহুৰ জলস্তৰ । আভ্যন্তৰীণ জল পৰিবহণ বিভাগে সোমবাৰৰ পৰা তিনি দিনৰ বাবে বন্ধ কৰিলে ব্ৰহ্মপুত্ৰৰ বুকুত ফেৰীৰ চলাচল ।

গুৱাহাটী,22 জুনঃ বিগত মে' মাহত বছৰৰ প্ৰথমটো বানপানীৰ ফলত মহানগৰীত ব্ৰহ্মপুত্ৰ নদীৰ জলস্তৰ দ্ৰুত গতিত বৃদ্ধি পাই সতৰ্ক সীমা অতিক্ৰম কৰিছিল যদিও বাৰিষাৰ পৰিমাণ হ্ৰাস পোৱাত পুনৰ স্বাভাৱিক অৱস্থালৈ ঘূৰি আহিছিল ব্ৰহ্মপুত্ৰৰ জলস্তৰ। কিছুদিন ধৰি ৰাজ্যত বানপানীৰ সমস্যা দেখা দিয়া নাছিল যদিও পুনৰ বৰষুণৰ মাত্ৰা বৃদ্ধি পোৱাত বছৰৰ দ্বিতীয়টো বানপানীয়ে দেখা দিছে ৰাজ্যত। উজনি অসমত কেইবাখনো গাঁও পানীৰ তলত ডুব যোৱাৰ সমান্তৰালভাৱে গুৱাহাটীতো বৃদ্ধি পাবলৈ ধৰিছে ব্ৰহ্মপুত্ৰৰ জলস্তৰ ।

ব্ৰহ্মপুত্ৰৰ বুকুত তিনি দিনৰ বাবে বন্ধ ফেৰীৰ চলাচল

বৰ্তমান জিলা উপায়ুক্ত কাৰ্যালয়ৰ সমীপত ব্ৰহ্মপুত্ৰৰ সতৰ্ক সীমাৰ ওপৰেৰে বৈ আছে । প্ৰতি ঘন্টাত ১ পৰা ২ ছেন্টিমিটাৰ বৃদ্ধি পাই আছে মহানগৰীত ব্ৰহ্মপুত্ৰৰ জলস্তৰ । বৃদ্ধিৰ এই ধাৰা অব্যাহত থাকিলে হয়তো অহাকালিৰ ভিতৰত ব্ৰহ্মপুত্ৰৰ জলস্তৰ মহানগৰীত বিপদ সীমা চেৰাই যোৱাৰ সম্ভাৱনা আছে । বৰ্তমানৰ গুৱাহাটীত ব্ৰহ্মপুত্ৰৰ জলস্তৰ হৈছে ৪৯.০৩ মিটাৰ আৰু বিপদ সীমা হৈছে ৪৯. ৬৮০।

ইফালে মহানগৰীত মহাবাহুৰ জলস্তৰ বৃদ্ধি পোৱাৰ লগে-লগে আভ্যন্তৰীণ জল পৰিবহণ বিভাগে সোমবাৰৰ পৰা তিনি দিনৰ বাবে ব্ৰহ্মপুত্ৰৰ বুকুত ফেৰীৰ চলাচল বন্ধ কৰিছে । ফেৰী সেৱা বন্ধ হোৱাত গুৱাহাটী আৰু উত্তৰ গুৱাহাটীৰ যাত্ৰী সকল কিছু সমস্যাৰ সন্মুখীন হৈছে যদিও জল পৰিবহন বিভাগে ব্ৰহ্মপুত্ৰৰ বাঢ়নী পানীৰ ৰূপ দেখি ফেৰী চলাচল বন্ধ কৰাৰ সিদ্ধান্ত গ্ৰহণ কৰিছে । মহানগৰীত গুৱাহাটী আৰু উত্তৰ গুৱাহাটীৰ মাজত ফেৰী চলাচলৰ বাবে ৬ টাকৈ ঘাট আছে আৰু এই ঘাট সমূহেৰে প্ৰতিদিনে কেইবাখনো ফেৰী যাত্ৰী লৈ নদীৰ বুকুৰে যাত্ৰা কৰে।