গুৱাহাটী, 17 জানুৱাৰীঃ গুৱাহাটীত চলি থকা তৃতীয় খেল’ ইণ্ডিয়া য়ুথ গেমছত আয়োজক ৰাজ্য অসমৰ প্ৰদৰ্শন সন্তুষ্টজনক । অসমৰ খেলুৱৈ সকলে উন্নত প্ৰদৰ্শন দাঙি ধৰি খেল’ ইণ্ডিয়া য়ুথ গেমছৰ বিভিন্ন শাখাত কেইবাটাও পদক লাভ কৰি ৰাজ্যলৈ গৌৰৱ কঢ়িয়াই আনিবলৈ সক্ষম হৈছে ।
বক্সিঙৰ ক্ষেত্ৰখনত বৰ্তমান উত্তৰ পূৱৰ খেলুৱৈ সকলৰ উন্নত প্ৰদৰ্শনৰ লগতে অসমৰ বক্সিঙ খেলুৱৈ সকলৰ প্ৰদৰ্শনেও সমগ্ৰ দেশৰে দৃষ্টি আকৰ্ষণ কৰিবলৈ সক্ষম হৈছে । কেইবাগৰাকী সম্ভাৱনাপূৰ্ণ খেলুৱৈৰে সজ্জিত অসমৰ বক্সিঙ দলটোৰ পৰা অধিক পদকৰ সম্ভাৱনাও নুই কৰিব নোৱাৰি । বৃহস্পতিবাৰৰ পৰা আৰম্ভ হোৱা বক্সিঙত অসমৰ পুৰুষ আৰু মহিলাই 12 টাকৈ বাউটত অংশগ্ৰহণ কৰি 7 টা বাউটত জয় লাভ কৰিছে ৷
ইপিনে প্ৰথমদিনাই বক্সিঙত অসমৰ পাঁচগৰাকীকৈ খেলুৱৈয়ে ছেমি ফাইনেল খেলাৰ যোগ্যতা অর্জন কৰিছে । শুকুৰবাৰেও অসমৰ খেলুৱৈয়ে 12 টাকৈ বাউটত অংশগ্ৰহণ কৰিব । এনে ক্ষেত্ৰত অসম দলৰ বক্সিঙৰ মুখ্য প্ৰশিক্ষক অমৰ ডেকাই অসম দলৰ পৰা বক্সিঙত অতি কমেও 15 টাকৈ পদক লাভ কৰাৰ আশা প্ৰকাশ কৰিছে ।
উল্লেখ্য যে, অহা 20 তাৰিখৰ পৰা আৰম্ভ হ'ব বক্সিঙত পদকৰ যুঁজ । পদৰ বাবে খেল আৰম্ভ হোৱাত সমগ্ৰ অসমবাসীৰ দৃষ্টি থাকিব অসমৰ দুগৰাকীকৈ মহিলা বক্সিঙ খেলুৱৈ লাভলীনা বুঢ়াগোঁহাই আৰু অংকুছিতা বড়োৰ ওপৰত ।
