গুৱাহাটী, ২৬ জুলাই: ৰাষ্ট্ৰপতি নিৰ্বাচনত কোনে কোনে কৰিলে ক্ৰছ ভোটিং ? কোনে কৰিলে নিজ দলক গাড্ডাৰী ? বিৰোধী কংগ্ৰেছ আৰু এ আই ইউ ডি এফৰ মাজত ইয়াকে লৈ চলি আছে তুমুল বিতৰ্ক । তাৰ মাজতে সোমবাৰে প্ৰদেশ কংগ্ৰেছৰ সভাপতি ভূপেন বৰাই চিনাক্ত কৰিলে ক্ৰছ ভোটিং তথা গাড্ডাৰী কৰা দলৰ ছয় বিধায়কক । এই ছয় বিধায়কৰ তালিকা লৈ আজি দিল্লী অভিমুখে ৰাওনা হ'ল প্ৰদেশ কংগ্ৰেছৰ সভাপতি ভূপেন বৰা (APCC president Bhupen Bora)।
ৰাষ্ট্ৰপতি নিৰ্বাচনত দলক বিশ্বাসঘাতকতা কৰা ছয় বিধায়কৰ তালিকা দিব কংগ্ৰেছ হাইকামাণ্ডক । হাইকামাণ্ডৰ নিৰ্দেশ মৰ্মে ব্যৱস্থা গ্ৰহণ কৰা হ'ব সেই ছয় বিধায়কৰ বিৰুদ্ধে । ৰাষ্ট্ৰপতি নিৰ্বাচনত কোনে ছয় বিধায়কে ক্ৰছ ভোটিং কৰিছিল তাৰ তালিকা অসম কংগ্ৰেছে প্ৰস্তুত কৰিছে যদিও নামসমূহ এতিয়াও প্ৰকাশ কৰা নাই । এই সন্দৰ্ভত আজি দিনৰ ভাগত প্ৰদেশ কংগ্ৰেছৰ সভাপতি ভূপেন বৰাই কয় যে, ক্ৰছ ভোটিং(Cross voting in president election) কৰা ছয় বিধায়কক চিনাক্ত কৰা হৈছে ।
ইতিমধ্য সকলোৱে গমেই পাইছে যে ছয়জন বিধায়কে খেলিমেলি কৰিছে । সংবাদ মাধ্যমৰ আগত এতিয়া নামকেইটা কোৱাত অসুবিধা আছে । তেওঁ কয় যে, কৰ্মৰ ফল ভোগ কৰিবই লাগিব । ইফালে বিধায়ক ৰেকিবুদ্দিন আহমেদে(MLA Rekibuddin Ahmed) কয় যে, দলক গাড্ডাৰী কৰা কংগ্ৰেছী বিধায়কক লালকিল্লা নহ’লে জজ ফিল্ডত ফাঁচী দিয়ক । বিজেপিক ভোট দিয়া কংগ্ৰেছী বিধায়কৰ বিৰুদ্ধে কঠোৰ হওক বুলি তেওঁ কয় ।
উল্লেখ্য যে ৰাষ্ট্ৰপতি নিৰ্বাচনত ২২ জন বিৰোধী দলৰ বিধায়কে এন ডি এৰ প্ৰাৰ্থীগৰাকীক ভোট দিছিল (Opposition vote to Droupadi Murmu)। যাক লৈ বিৰোধীৰ মাজত আৰম্ভ হৈছিল বোকা ছটিওৱাৰ ৰাজনীতি । অসমত এন ডি এৰ মুঠ বিধায়কৰ সংখ্যা হৈছে ৭৯ জন । ইয়াৰে বিজেপিৰ ৬৩ জন, অগপৰ ৯ জন আৰু ইউ পি পি এলৰ ৭জন বিধায়ক । আনহাতে, বি পি এফৰ তিনিজন বিধায়কেও ভোট দিছিল এন ডি এৰ প্ৰাৰ্থীগৰাকীক ।
সেই অনুসৰি এন ডি এৰ প্ৰাৰ্থীগৰাকীয়ে অসমৰ মুঠ ৮২ জন বিধায়কৰ ভোট নিশ্চিতভাৱে লাভ কৰিছিল । কিন্তু ভোট গণনাত দেখা গ'ল যে দ্ৰৌপদী মুৰ্মুৱে অসমৰ পৰা মুঠ ১০৪ টা ভোট লাভ কৰিছে । ইফালে বিৰোধী দল কংগ্ৰেছৰ বিধায়কৰ সংখ্যা হ’ল ২৭ জন । ইয়াৰে তিনিজন নিলম্বিত হৈ আছে (Suspended congress MLA of Assam)। এ আই ইউ ডি এফৰ ১৫ জন বিধায়ক আছিল যদিও দুজনে ভোট দিয়া নাছিল ।
আনহাতে, বিধানসভাত চি পি এমৰ এজন আৰু ৰাইজৰ দলৰ এজন বিধায়ক আছে । ইয়াকে ধৰি বিৰোধীৰ শিবিৰত থকা ৪২ জন বিধায়কে ভোট দিছিল । কিন্তু বিৰোধী দলৰ প্ৰাৰ্থী যশোৱন্ত সিনহাই অসমৰ বিৰোধী শিবিৰৰ পৰা লাভ কৰিছিল মাত্ৰ ২০ জন বিধায়কৰ ভোটহে । কংগ্ৰেছৰ মতে তেওঁলোকৰ ছয়জন বিধায়কে ক্ৰছ ভোটিং কৰিছে আৰু তেওঁলোকক চিনাক্ত কৰা হৈছে । এতিয়া কংগ্ৰেছ হাইকামাণ্ডে সেই ছয়জন বিধায়কৰ বিৰুদ্ধে কি ব্যৱস্থা গ্ৰহণ কৰে সেয়া লক্ষণীয় হ'ব ।
লগতে পঢ়ক: Tripura BJP political crisis: ত্ৰিপুৰাত বিজেপিৰ বিধায়কে যোগ দিব কংগ্ৰেছত
