গুৱাহাটী, ২৭ মে': ক'ভিডৰ নামত বৰ্ত্তমানৰ মুখ্যমন্ত্ৰী আৰু তেতিয়াৰ স্বাস্থ্যমন্ত্ৰী ড৹ হিমন্ত বিশ্ব শৰ্মাৰ দিনত কেলেংকাৰী হোৱাৰ গুৰুতৰ অভিযোগ উত্থাপন কৰিছে প্ৰদেশ কংগ্ৰেছে । আজি গুৱাহাটীৰ ৰাজীৱ ভৱনত এখন সংবাদমেল সম্বোধন কৰি মুখ্যমন্ত্ৰীৰ বিৰুদ্ধে সৰৱ হৈ কেতবোৰ গুৰুতৰ অভিযোগ উত্থাপন কৰে প্ৰদেশ কংগ্ৰেছৰ সংবাদ মাধ্যম বিভাগৰ অধ্যক্ষ মনজিৎ মহন্তই ।
তেওঁ কয় যে ২০২০ চনৰ ১৫ এপ্ৰিলৰ মাজনিশা গুৱাহাটীৰ বৰঝাৰ বিমান বন্দৰৰ ‘ৰাণ-ৱে’ত ‘ব্লু-ডাৰ্ট’ৰ এখন সামগ্ৰী পৰিবাহী বিমানৰ সন্মুখত থিয় হৈ চীন দেশৰ পৰা অসমে ক'ভিড পৰিস্থিতিৰে মোকাবিলা কৰিবলৈ ৫০ হাজাৰ বিশেষ পি পি ই কীট আমদানি কৰি আনিছে বুলি প্ৰচাৰ চলাইছিল তেতিয়াৰ স্বাস্থ্য তথা বিত্ত মন্ত্ৰী আৰু আজিৰ মুখ্যমন্ত্ৰী ড৹ হিমন্ত বিশ্ব শর্মাই । সেই সময়ৰ ফাঁকি এতিয়া জলজল পটপটকৈ ওলাই পৰিল (Purchase of PPE kit from China) ৷
অসমৰ চিকিৎসক আৰু নাৰ্ছ সকলৰ নিৰাপদ চিকিৎসা সেৱাৰ তাগিদাত দেশৰ ভিতৰতে অসমে প্ৰথম চীনৰ পৰা নিজাববীয়াকৈ পি পি ই কীট আমদানি কৰিছে বুলি তেতিয়া ঘোষণা কৰি ড৹ হিমন্ত বিশ্ব শৰ্মাই সৰ্বত্ৰ বাঃ বাঃ ল’বলৈ চেষ্টা কৰা ভেল্কিবাজীৰ স্বৰূপ শেহতীয়াকৈ অতি উলংগ ৰূপত ৰাইজৰ সন্মুখত উন্মোচিত হ’ল বুলি তেওঁ কয় ।
তেওঁ সংবাদ মাধ্যমৰ উদ্ধৃতি দি ‘আৰ টি আই’ৰ প্ৰসংগৰে কয় যে অসম চৰকাৰৰ ক’ভিড প্ৰতিৰোধী সকলো সা-সামগ্ৰী ক্ৰয়ৰ দায়িত্বত থকা ৰাষ্ট্ৰীয় স্বাস্থ্য মিছনে চীনৰ পৰা পি পি ই কীট বাদেই ক’ভিড প্ৰতিৰোধ অভিযানৰ কোনো সা-সামগ্ৰী ক্ৰয় কৰা নাই আৰু এনে সামগ্ৰীৰ বাবদ কাকো এটকাও আদায় দিয়াৰ তথ্য ৰাষ্ট্ৰীয় স্বাস্থ্য মিছনৰ হাতত নাই (NHM did not purchase PPE kits from China)।
লগতে পঢ়ক: George Bordoloi suicide case : পৱন বৰঠাকুৰৰ নেতৃত্বত তিনিজনীয়া তদন্ত সমিতি গঠন
অর্থাৎ ৰাষ্ট্ৰীয় স্বাস্থ্য মিছনে পোনে পোনেই হিমন্ত বিশ্ব শৰ্মাৰ দাবীক নস্যাৎ কৰিলে আৰু প্ৰত্যক্ষভাৱেই ইয়াক মিছা বুলি অভিহিত কৰিলে । ৰাষ্ট্ৰীয় স্বাস্থ্য মিছনে আৰ টি আইৰ উত্তৰত ইয়াকো জনালে যে ৰাষ্ট্ৰীয় স্বাস্থ্য মিছন অসমে দেশৰ বিভিন্ন প্ৰতিষ্ঠানক পি পি ই কীট যোগানৰ কাম ন্যস্ত কৰিছিল ।
তেওঁ কয় যে এখন সৰ্বভাৰতীয় বাৰ্তালোচনীত ড৹ হিমন্ত বিশ্ব শৰ্মাই কেনেকৈ নিয়ম ভাঙি চীনৰ পি পি ই কীট ক্ৰয় কৰিবলৈ আগবাঢ়িল সেই সম্পৰ্কে এটা বাতৰি প্ৰকাশ পাইছিল । য’ত দিল্লীৰ এটা যোগানকাৰী প্ৰতিষ্ঠানক অসম চৰকাৰে ২০২০ চনৰ ২৯ মাৰ্চত ৫০ হাজাৰ পি পি ই কীট যোগানৰ ফৰমাইচ দিছিল বুলি প্ৰকাশ । কিন্তু এতিয়া ইয়াৰ বিপৰীতে ৰাষ্ট্ৰীয় স্বাস্থ্য মিছন অসমৰ আৰ টি আইৰ উত্তৰত কোৱা হৈছে যে ২০২০ চনৰ ১৮ মাৰ্চৰ পৰা ২০২২ চনৰ ৪ জানুৱাৰীলৈকে অসমলৈ ৫০ হাজাৰ পি পি ই কীট যোগানৰ কোনো তথ্য নাই ।
ইয়াৰ মাজত কেৱল ২০২০ চনৰ ২৮ মাৰ্চত এম বি ট্ৰেডাৰ্ছ নামৰ এটা প্ৰতিষ্ঠানৰ পৰা ৯৫১.০৮ টকা দৰত ১০ হাজাৰ পি পি ই কীট ক্ৰয়ৰ তথ্যহে স্বাস্থ্য মিছনৰ তথ্যত উল্লেখ কৰা হয় । অর্থাৎ ২০২০ চনৰ ১৫ এপ্ৰিলৰ মাজনিশা ড৹ হিমন্ত বিশ্ব শৰ্মাই সাফল্যৰ ফটা ঢোল বজোৱা এখন নাটক সুকলমে মঞ্চস্থ কৰিলে বুলি তেওঁ অভিযোগ কৰে ।
তেওঁ মুখ্যমন্ত্ৰী ড৹ শৰ্মাক উদ্দেশ্যি প্ৰশ্ন কৰি কয় যে সেই ৫০ হাজাৰ পি পি ই কীট যদি ৰাষ্ট্ৰীয় স্বাস্থ্য মিছন অসমে ক্ৰয় কৰা নাছিলেই তেন্তে মুখ্যমন্ত্ৰীয়ে ৰাজহুৱা কৰক কোনে সেই পি পি ই কীট ক্ৰয় কৰিছিল । আনহাতে সেই ৫০ হাজাৰ পি পি ই কীটৰ বাবদ ১৫ কোটি টকা কোনে ব্যয় কৰিছিল ।
সেই ৫০ হাজাৰ পি পি ই কীট এতিয়া ক'ত জমা কৰি থোৱা আছে আৰু চীন দেশৰ পৰা ৫০ হাজাৰ পি পি ই কীট ক্ৰয় কৰি যোগান ধৰিবলৈ কোন ভাৰতীয় প্ৰতিষ্ঠানক ফৰমাইচ দিয়া হৈছিল । ক’ভিড পৰিস্থিতিৰ মোকাবিলাত হোৱা আয়-ব্যয়ৰ হিচাব ৰাজহুৱা কৰিবলৈ বাৰম্বাৰ বিভিন্ন পক্ষই দাবী জনোৱাৰ পিছতো কিয় আজিলৈকে সকলো গাপ দি থোৱা হ'ল বুলি প্ৰশ্ন কৰি তেওঁ উত্তৰ দিয়াৰ বাবে মুখ্যমন্ত্ৰীক প্ৰত্যাহ্বান জনায় ।
প্ৰদেশ কংগ্ৰেছে এই বিষয়ত এখন শ্বেতপত্ৰ প্ৰকাশ কৰি অসমৰ ৰাইজক সকলো সত্য তথ্য সহকাৰে দাঙি ধৰিবৰ বাবে চৰকাৰক দাবী জনায় ।
লগতে পঢ়ক: "পতিতালয় চলোৱাটোহে বেআইনী, কিন্তু যৌন কৰ্ম অবৈধ নহয়"- উচ্চতম ন্যায়ালয়
