গুৱাহাটী, 16 ডিচেম্বৰ: অসমৰ নাট্য আন্দোলনৰ এক দীঘলীয়া বাটচ’ৰাত বিভিন্ন সময়ত বিভিন্নজন নাট্যকৰ্মীয়ে ভিন্ন নাট্য পৰীক্ষা চলায় অহা পৰিলক্ষিত হৈ আহিছে ৷ নাট্য জগতখনত নাট্যচিন্তা, নাট্য শিল্পক লৈ বিভিন্ন সময়ত বিভিন্নজনে চলায় যোৱা পৰীক্ষা-সম্পৰীক্ষাৰ ক্ষেত্ৰত সদায়ে নাম ল’ব লাগিব শুক্ৰাচাৰ্য ৰাভাৰ (Badungduppa Kala Kendra of Shukracharya Rabha) ৷ শুক্ৰাচাৰ্য ৰাভাৰ অনবদ্য সৃষ্টি বাদুংদুপ্পা কলা কেন্দ্ৰই 2022 বৰ্ষত ভৰি থ’লে 24 বছৰত (Badungduppa Kala Kendra celebrating 24 years) ৷
বিগত বছৰসমূহৰ দৰে এই বছৰো শাল গছৰে আবৃত্ত প্ৰাকৃতিক পৰিৱেশত অনুষ্ঠিত কৰা হৈছে ' আণ্ডাৰ দ্যা শাল ট্ৰি' 2022 ৰ ত্ৰয়োদশ বাৰ্ষিক নাট্য সমাৰোহ (Under the Sal tree) । 1998 চনত গোৱালপাৰাৰ ৰামপুৰত নাট্যকাৰ, অভিনেতা, পৰিচালক প্ৰয়াত শুক্ৰাচাৰ্য ৰাভাৰ ঐকান্তিক প্ৰচেষ্টাৰ ফচল বাদুংদুপ্পা কলাকেন্দ্ৰ তথা 'আণ্ডাৰ দ্যা শাল ট্ৰি 'ৰ মঞ্চত এতিয়া দেশী বিদেশী নাট্যকাৰ পৰিচালক অভিনেতাৰ সমাহাৰ ।
বৃহস্পতিবাৰৰ পৰা তিনিদিনীয়া কাৰ্যসূচীৰে অনুষ্ঠিত হোৱা ' আণ্ডাৰ দ্যা শাল ট্ৰি ' ত্ৰয়োদশ বাৰ্ষিক নাট সমাৰোহত বিভিন্ন ভাষা, বিভিন্ন জাতি-জনগোষ্ঠীৰ থলুৱা লোকাচাৰো জিলিকি উঠা পৰিলক্ষিত হ’ল । যান্ত্ৰিক শব্দ-পোহৰ বিহীন প্ৰাকৃতিক পৰিৱেশৰ অকৃত্ৰিম নাট্যমঞ্চত বিগত বছৰসমূহৰ দৰে এইবাৰো অনুষ্ঠিত হয় নাট সমাৰোহখনি ।
দেশৰ বিভিন্ন প্ৰান্তৰ লগতে আন্তঃৰাষ্ট্ৰীয় পৰ্যায়ৰ নাট্যকৰ্মীসকলেও নিজৰ সুকীয়া কলা পৰিৱেশন কৰে শুক্ৰাচাৰ্য ৰাভাৰ শালনীবাৰীত । ইফালে প্ৰয়াত শুক্ৰাচাৰ্য ৰাভাৰ পত্নী তথা বাদুংদুপ্পা কলাকেন্দ্ৰৰ সভানেত্ৰী চীনা ৰাভাই শুক্ৰাচাৰ্য ৰাভাই দেখুৱাই যোৱা নাট্যশৈলীকে পৰৱৰ্তী সময়তো অক্ষুন্ন ৰখাৰ কথা উল্লেখ কৰে সংবাদ মাধ্যমৰ আগত ।
অহা বছৰ অৰ্থাৎ 2023 বৰ্ষত বাদুংদুপ্পা কলা কেন্দ্ৰই ভৰি থ’ব ৰূপালী জয়ন্তী বৰ্ষত ৷ গতিকে ৰূপালী জয়ন্তী বৰ্ষৰ সৈতে সংগতি ৰাখি বিস্তৃত কাৰ্যসূচীৰে নাট সমাৰোহ অনুষ্ঠিত কৰাৰ পৰিকল্পনা কৰাৰ কথা সংবাদ মাধ্যমৰ আগত অৱগত কৰে বাদুংদুপ্পা কলাকেন্দ্ৰৰ পৰিচালন সঞ্চালক মদন ৰাভাই । ইফালে ত্ৰয়োদশ নাট সমাৰোহত প্ৰথমখনি নাট ঋচি জলংকা নিবেদন কৰে বাদুংদুপ্পা কলা কেন্দ্ৰই । ৰাভা ভাষাত পৰিৱেশিত নাটখনিয়ে সমাজ জীৱনৰ এখন বাস্তৱ ছবি দাঙি ধৰিবলৈ চেষ্টা কৰাৰ কথা উল্লেখ কৰে মদন ৰাভাই ।
উল্লেখ্য যে, গোৱালপাৰাৰ ৰামপুৰত অৱস্থিত শুক্ৰাচাৰ্য ৰাভাৰ এই বাদুংদুপ্পা কলাকেন্দ্ৰই ৰাষ্ট্ৰীয়-আন্তঃৰাষ্ট্ৰীয় পৰ্যায়ত অৰ্জন কৰিছে বিশেষ খ্যাতি ।
লগতে পঢ়ক: Conflict between BJP and NPP: বিজেপিৰ পৰা নিজকে ৰক্ষাৰ চেষ্টা কনৰাড চাংমাৰ
