গুৱাহাটী, 18 জুন: বিশ্ব প্ৰসিদ্ধ অম্বুবাচী মহামেলালৈ মাজত মাত্ৰ কেইটামান দিন বাকী ৷ 22 জুনৰ পৰা শক্তিপীঠ কামাখ্যাত অনুষ্ঠিত হ’ব মহা অম্বুবাচী মেলা ৷ ইতিমধ্যে মা কামাখ্যাৰ পবিত্ৰস্থল নীলাচল পাহাৰলৈ আগমণ ঘটিছে বিভিন্ন প্ৰান্তৰ সাধু-সন্নাসী আৰু ভক্ত-দৰ্শনাৰ্থীৰ ৷ মেলাক লৈ উখল-মাখল হৈ পৰিছে নীলাচল পাহাৰ ৷
অম্বুবাচীক লৈ পৰ্যটন বিভাগ আৰু জিলা প্ৰশাসনৰ লগতে কামাখ্যা দেৱালয়ে ব্যাপক প্ৰস্তুতি চলাইছে ৷ উল্লেখ্য যে, এইবাৰ সোণাৰাম খেলপথাৰৰ পৰিৱৰ্তে কামাখ্যা ষ্টেচনত হ’ব অম্বুবাচীৰ শুভাৰম্ভণি অনুষ্ঠান ৷ ইফালে অম্বুবাচী উপলক্ষে সোণাৰাম খেলপথাৰ কেৱল পাৰ্কিঙৰ বাবে ৰখা হ’ব ৷ অন্য স্থানৰ পৰিৱৰ্তে পাণ্ডু প'ৰ্ট আৰু কামাখ্যা ৰে’ল ষ্টেচনত ভক্তৰ শিবিৰৰ ব্যৱস্থা কৰা হৈছে ৷ ভক্তৰ সুবিধাৰ্থে শিবিৰসমূহত সকলো ব্যৱস্থা গ্ৰহণ কৰা হৈছে ৷
অম্বুবাচী মেলাৰ প্ৰস্তুতি সন্দৰ্ভত সৱিশেষ জনাৰ বাবে ইটিভি ভাৰতৰ তৰফৰ পৰা কামাখ্যা দেৱালয়ৰ বৰ দলৈ কবিন্দ্ৰ শৰ্মাক সাক্ষাৎ কৰা হৈছিল ৷ আছুতীয়া সাক্ষাৎকাৰত তেওঁ কয় যে 22 জুনৰ নিশা 2 বাজি 30 মিনিট 42 ছেকেণ্ডত অম্বুবাচী মহাযোগৰ প্ৰবৃত্তি হ'ব ৷ 23 জুনৰ পৰা 25 জুনলৈ বন্ধ থাকিব মন্দিৰৰ দ্বাৰ ৷ 26 জুনৰ পুৱা পৰম্পৰা অনুসৰি দেৱীৰ স্নান তথা নিত্যপূজা সম্পন্ন কৰাৰ পাছত খুলি দিয়া হ’ব কামাখ্যা মন্দিৰৰ দ্বাৰ ৷ অম্বুবাচী উপলক্ষে 26 জুনত কামাখ্যা মন্দিৰত নাথাকিব কোনো ভি ভি আই পি তথা ভি আই পিৰ ব্যৱস্থা ৷
আনহাতে এইবাৰ অম্বুবাচীৰ দিনকেইটাত পুৱা 5 বজাৰ পৰা নিশা 9 বজালৈহে নীলাচলত প্ৰৱেশ কৰিব পাৰিব ভক্তসকল ৷ নিশা 9 বজাৰ পাছত প্ৰৱেশত বাধা থাকিব ৷ তেওঁ জনোৱা মতে বিগত বৰ্ষত অম্বুবাচী মেলাৰ সময়ত 20 লাখৰ পৰা 25 লাখ লোকৰ কামাখ্যা মন্দিৰলৈ আগমণ ঘটিছিল ৷
এইবাৰ ভক্তৰ সংখ্যা আৰু বৃদ্ধি পোৱাৰ সম্ভাৱনা আছে ৷ অম্বুবাচীৰ সময়ত ভক্তসকলৰ নিৰাপত্তাৰ বাবে প্ৰয়োজন হোৱা সকলো দিশৰ ওপৰত গুৰুত্ব দিয়া হৈছে বুলিও তেওঁ কয় ৷ নীলাচল পাহাৰত ভক্ত থকাৰ বাবে কোনো ধৰণৰ শিবিৰৰ আৰু খোৱা খাদ্য বিতৰণৰ ব্যৱস্থা কৰা হোৱা নাই ৷ মন্দিৰ চৌহদৰ স্বচ্ছতাৰ ওপৰত বিশেষ গুৰুত্ব দি এই ব্যৱস্থা কৰা হৈছে বুলি জানিবলৈ দিয়ে কবিন্দ্ৰ শৰ্মাই ৷
অম্বুবাচী মেলাৰ সময়ত নেপাল, অষ্ট্ৰেলিয়া, থাইলেণ্ড, ইংলেণ্ড আদি বিভিন্ন ৰাষ্ট্ৰৰ ভক্ত-সন্ন্যাসীৰ নীলাচল পাহাৰত সমাগম ঘটে ৷ আনহাতে নীলাচল পাহাৰত অন্ধবিশ্বাসৰ বলি হৈ অসৎ উদ্দেশ্য পূৰণৰ বাবে বহু লোক অহা সন্দৰ্ভত তেওঁ কয় যে, অম্বুবাচী মেলাৰ সময়ত সকলো লোকেই সৎ উদ্দেশ্য লৈ আহে বুলি ক'ব নোৱাৰি ৷
বহু লোকে অসৎ উদ্দেশ্য লৈ আহে ৷ ইয়াৰ বাবে সতৰ্কতাৰ উদ্দেশ্যে জিলা প্ৰশাসনৰ লগত কেইবালানি আলোচনা হোৱা বুলি তেওঁ জানিবলৈ দিয়ে ৷ নীলাচল পাহাৰত বহু বছৰ পূৰ্বে এগৰাকী মহিলাক বলি দিয়া ঘটনা সন্দৰ্ভত তেওঁ কয় যে কামাখ্যা মন্দিৰত মানুহ বলি দিয়াৰ কোনো ইতিহাস নাই ৷ কামাখ্যা মন্দিৰত মতা ম'হ, ছাগলী, পাৰ, হাঁহ আদি বলি দিয়া হয় ৷ কামাখ্যা মন্দিৰত নাৰীক পূজা কৰা হয় বুলি তেওঁ কয় ৷
লগতে পঢ়ক: Large crack in Bharalu guard wall: ভৰলুৰ গাৰ্ডৱালত বৃহৎ ফাট: শংকিত অনিল নগৰবাসী
