গুৱাহাটী 2 ফেব্ৰুৱাৰী:মুখ্যমন্ত্ৰী ড৹ হিমন্ত বিশ্ব শর্মাই আজি জনতা ভৱনত লোক নির্মাণ (গৃহ) বিভাগৰ জ্যেষ্ঠ বিষয়াসকলৰ সৈতে বিভিন্ন মূলধন আন্তঃগাঁথনি প্ৰকল্প সম্পর্কীয় দীঘলীয়া বিস্তৃত পৰ্যালোচনা বৈঠকত অংশগ্ৰহণ কৰে (CMs review on various capital infrastructure projects) । বৈঠকত কেইবাটাও গুৰুত্বপূৰ্ণ সিদ্ধান্ত গ্ৰহণ কৰা হয় । প্ৰকল্পসমূহৰ দক্ষ আৰু দ্ৰুত কাৰ্যকৰীকৰণ নিশ্চিত কৰাৰ বাবে বিভাগটোৰ ৩৭টা সংমণ্ডলক শক্তিশালী কৰা আৰু ইয়াৰ অংশ হিচাপে প্ৰতিটো সংমণ্ডলত ব্যক্তিগত আৰ্কিটেক্টক সুবিধা প্ৰদানেৰে নতুন আৰ্কিটেক্ট পদ সৃষ্টি কৰা হ’ব ।
আনহাতে প্ৰতিটো সংমণ্ডলৰ কাৰ্যবাহী অভিযন্তাক অতিৰিক্ত কার্যবাহী অভিযন্তা আৰু অতিৰিক্ত অভিযন্তাৰ সহায়ত গাঁথনিগত ডিজাইন অনুমোদনৰ ক্ষমতা প্ৰদান কৰা হ'ব । এই উদ্দেশ্যত লোক নির্মাণ (গৃহ আৰু ৰাষ্ট্ৰীয় ঘাইপথ) আয়ুক্তই অভিযন্তাসকলৰ বাবে এক ৰিফ্ৰেচাৰ পাঠ্যক্ৰমৰ ব্যৱস্থা কৰিব । অতি প্ৰত্যাহ্বানজনক গাঁথনিগত ডিজাইনৰ ক্ষেত্ৰত প্ৰতিষ্ঠিত প্ৰতিষ্ঠান আৰু ব্যক্তিসকলৰ বিশেষজ্ঞ সেৱাসমূহো গ্ৰহণ কৰা হ’ব ।
প্ৰকল্পৰ সময়মতে সম্পূর্ণকৰণ নিশ্চিত কৰাৰ বাবে পৰ্যবেক্ষণ কৰাটো মুখ্য অভিযন্তা আৰু অধীক্ষক অভিযন্তাসকলৰ ভূমিকা হ'ব । সেইদৰে সকলো সংমণ্ডল আৰু উপ-সংমণ্ডলৰ কাৰ্যক্ষমতা বৃদ্ধিৰ হেতু দ্ৰুত পদোন্নতি আৰু নিযুক্তি কৰা হ'ব । ৫০ কোটি টকাৰ ওপৰৰ সকলো প্ৰকল্প পি এম চিৰ জৰিয়তে সম্পাদন কৰা হ'ব । বৈঠকত মুখ্যমন্ত্ৰীয়ে অভিযান্ত্ৰিক মহাবিদ্যালয়, সমন্বিত উপায়ুক্ত কাৰ্যালয়, চৰকাৰী মহাবিদ্যালয়, আদর্শ মহিলা মহাবিদ্যালয়, নতুন বিশ্ববিদ্যালয়, চিকিৎসা মহাবিদ্যালয়, অসম ভৱন আৰু অসম গৃহ, জনতা ভৱনত মুখ্যমন্ত্ৰী ব্লক, বিধানসভা ভৱন আৰু একত্ৰিত সঞ্চালকালয়ৰ নিৰ্মাণৰ অগ্ৰগতিৰ সম্পৰ্কেও বুজ লয় ।
লগতে চাহ বাগিচাত নিৰ্মাণ কৰা ৮৪খন আদর্শ হাইস্কুল এপ্ৰিলৰ মাজভাগত উদ্বোধন কৰা হ'ব বুলিও ঘোষণা কৰে । বৈঠকত বিধায়ক তথা মুখ্যমন্ত্ৰীৰ ৰাজনৈতিক সচিব জয়ন্ত মল্ল বৰুৱা, মুখ্যমন্ত্ৰীৰ প্ৰধান সচিব সমীৰ কুমাৰ সিনহা, লোক নির্মাণ (গৃহ আৰু ৰাষ্ট্ৰীয় ঘাইপথ)ৰ আয়ুক্ত আৰু বিশেষ সচিব ৰাজ চক্ৰৱৰ্তী আৰু বিভাগীয় অন্যান্য জ্যেষ্ঠ বিষয়াসকল উপস্থিত আছিল ।
লগতে পঢ়ক: Assam cabinet: কি কি সিদ্ধান্ত ল'লে আজিৰ কেবিনেটে ?
