গুৱাহাটী , 6 মাৰ্চঃ শুকুৰবাৰে স্বাস্থ্য পৰীক্ষাৰ বাবে জি এম চি এইছলৈ অনা হ’ল কাৰাগাৰত পুনৰ গুৰুতৰভাৱে অসুস্থ হোৱা অখিল গগৈক ৷ পুৱা প্ৰায় ৯.৩০ বজাত গুৱাহাটী কেন্দ্ৰীয় কাৰাগাৰ কৰ্তৃপক্ষই জি এম চি এইছলৈ লৈ আনে কৃষক নেতা গৰাকীক ৷ NIA আদালতে নিৰ্দেশ প্ৰদান কৰাৰ পাছতে উন্নত চিকিৎসাৰ বাবে অখিলক গগৈক লৈ অহা হয় চিকিৎসালয়লৈ ৷ জি এম চি এইছ চৌহদৰ পৰা অসুস্থ কৃষক নেতা গৰাকীৰ ৰাইজলৈ আহ্বান,কা বিৰোধী সংগ্ৰামৰ বাবে ঐক্যবদ্ধ হ’ব লাগিব অসমীয়া ৷
হাস্পতাল চৌহদত নেতা গৰাকীক সাক্ষাৎ কৰিবৰ বাবে উপস্থিত হয় জনপ্ৰিয় কণ্ঠশিল্পী মানস ৰবীন,স্বৰাজ অসমৰ আহ্বায়ক ভবেন সন্দিকৈ,কৃষক মুক্তি সংগ্ৰাম সমিতিৰ সভাপতি ভাস্ক'ডি শইকীয়াকে প্ৰমুখ্য কৰি তেখেতৰ সতীৰ্থ সকল ৷ নেতা গৰাকীক সাক্ষাৎ কৰাৰ পাছতে মানস ৰবীনে সংবাদ মাধ্যমৰ আগত মন্তব্য কৰে যে,পেটৰ বিষৰ পৰা অখিল গগৈয়ে উপশম পাইছে যদিও নেতা গৰাকীৰ কিডনীত পাথৰ ধৰা পৰিছে ৷ চিকিৎসকে পৰীক্ষা কৰাৰ পাছতেই পুনৰ কাৰাগাৰলৈ প্ৰেৰণ কৰা হ'ল কৃষক নেতা গৰাকীক ৷
আনহাতে,অসুস্থ অৱস্থাত পুনৰ কাৰাগাৰলৈ নিক্ষেপ কৰা কাৰ্যত ক্ষোভিত হৈ পৰিছে কৃষক মুক্তি সংগ্ৰাম সমিতিৰ সদস্যসকল ৷ অখিল গগৈৰ ওপৰত চলা চৰকাৰী নিৰ্যাতন এক ৰাজনৈতিক ষড়যন্ত্ৰ বুলি মন্তব্য কৰে সংগঠনটোৱে ৷
