গুৱাহাটী,10 জানুৱাৰীঃ 14 দিনৰ ন্যায়িক জিম্মাৰ অন্তত শুকুৰবাৰে নিয়া আদালতত হাজিৰ কৰা হ’ল অখিল গগৈক ৷ অখিল গগৈৰ সমৰ্থকৰ চিঞৰত উত্তাল হয় আদালতৰ চৌহদ ৷ আৰক্ষীৰ তৎপৰতাত সমৰ্থকক আঁতৰাবলৈ চেষ্টা কৰা হয় যদিও সমৰ্থকসকলে গামোচা পিন্ধাই আদৰণি জনায় কৃষক নেতাগৰাকীক ৷ আনহাতে,আদালতৰ চৌহদৰ ভিতৰত "কা" মানি লোৱা নহ’ব বুলি কৈ একত্ৰিত সংগ্ৰাম চলোৱাৰ বাবে সমূহ অসমবাসীকে অভিনন্দন জনায় কৃষক নেতা অখিল গগৈয়ে ৷
উল্লেখ্য যে,ৰাজ্যত সান্ধ্য আইন জাৰী থকাৰ মাজতে আন্দোলনৰ নেতৃত্ব লোৱাৰ বাবে যোৰহাটৰ পৰা গ্ৰেপ্তাৰ কৰা হৈছিল কৃষক নেতাগৰাকীক ৷ নিয়াই ডিব্ৰুগড় আৰক্ষী থানাত গগৈৰ বিপক্ষে 13/2019 নং এক গোচৰ ৰুজু কৰিছিল ৷ 11 ডিচেম্বৰৰ পৰা যোৰহাট কেন্দ্ৰীয় কাৰাগাৰত বন্দী হৈ থকা কৃষক নেতাগৰাকীক ১৬ ডিচেম্বত গুৱাহাটীৰ নিয়াৰ আদালতত হাজিৰ কৰোৱা হয় ৷ তাৰ পাচতে আদালতে তেখেতক ১০ দিনৰ বাবে এন আই এৰ জিম্মালৈ প্ৰেৰণ কৰে। অখিল গগৈৰ বিৰুদ্ধে ইতিমধ্যে ইউ এ পি এ'ৰ অধীনত ১২০ (বি), ১২৪ (এ), ১৫৩ (এ), ১৫৩ (বি) ধাৰাৰ লগতে ইউ পি এ (এ) সংলগ্ন ১৮/৩৯ ধাৰাত গোচৰ ৰুজু কৰা হৈছে । তাৰোপৰি নেতা গৰাকীক আদালতত হাজিৰ কৰাৰ পূৰ্বে নিয়াই অখিল গগৈৰ বাসগৃহ আৰু কৃষক মুক্তি সংগ্ৰাম সমিতিৰ মুখ্য কার্যালয়ত অভিযান চলাই লেপটপৰ লগতে বহু গুৰুত্বপূৰ্ণ নথি-পত্ৰ জব্দ কৰিছিল ।
