গুৱাহাটী, 13 জুন: অসম চৰকাৰৰ স্বাস্থ্য বিভাগৰ চতুৰ্থ বৰ্গৰ খালী পদ পূৰণৰ বাবে অহা ১৯ জুনত অনুষ্ঠিত হ’বলগীয়া লিখিত পৰীক্ষাত প্ৰতি জিলাৰ প্ৰাৰ্থীক নিজ জিলাতে পৰীক্ষা দিয়াৰ সুবিধা দিবলৈ দাবী জনাইছে এ আই ইউ ডি এফৰ সাধাৰণ সম্পাদক আমিনুল ইছলামে (AIUDF general secretary)৷
গুৱাহাটীত সোমবাৰে অনুষ্ঠিত এখন সংবাদ মেলত এ আই ইউ ডি এফৰ সাধাৰণ সম্পাদক আমিনুল ইছলামে কয় যে অসম চৰকাৰে স্বাস্থ্য বিভাগৰ চতুৰ্থ বৰ্গৰ ১১৯২ টা খালী পদত নিযুক্তি দিবলৈ প্ৰক্ৰিয়া আৰম্ভ কৰিছে (DHSFW examination for Grade 4 post) ৷ উক্ত পদৰ বাবে অহা ১৯ জুনত অনুষ্ঠিত হ’বলগীয়া লিখিত পৰীক্ষাত বহু জিলাৰ প্ৰাৰ্থীয়ে নিজ জিলা অথবা কাষৰীয়া জিলাৰ সলনি দূৰৰ জিলাৰ পৰীক্ষা কেন্দ্ৰত অৱতীৰ্ণ হ’ব লাগিব ৷ তদুপৰি পৰীক্ষাৰ তাৰিখক লৈ চৰকাৰে বিভ্ৰান্তিৰ সৃষ্টি কৰিছে ।
তেওঁ কয় যে অসম চৰকাৰ তথা সংশ্লিষ্ট বিভাগৰ অবিবেচকী সিদ্ধান্তৰ ফলত নিবনুৱা যুৱক-যুৱতীসকলৰ বহু কষ্টৰ লগতে যথেষ্ট খৰচ হোৱাৰ সম্ভাৱনা প্ৰকট হৈ পৰিছে ৷ যুৱতী প্ৰাৰ্থীসকলে আৰু অধিক সমস্যাত পৰিব ৷ তেওঁ ক্ষোভ প্ৰকাশ কৰি কয় যে বিভাগৰ আজৱ সিদ্ধান্তৰ বাবে বৰপেটাকে ধৰি নামনি অসমৰ বিভিন্ন জিলাৰ প্ৰাৰ্থীৰ বাবে ৪০০/৫০০ কিলোমিটাৰ দূৰৰ তিনিচুকীয়া, বিশ্বনাথ আদি জিলাত পৰীক্ষা কেন্দ্ৰ নিৰ্ধাৰণ কৰিছে ৷
ঠিক সেইদৰে নগাঁও জিলাৰ প্ৰাৰ্থীৰ বাবে ডিব্ৰুগড় জিলাত কেন্দ্ৰ নিৰ্ধাৰণ কৰিছে ৷ এয়া অবিবেচকী আৰু আজৱ কাণ্ড হিচাপেই বিবেচিত হৈছে ৷ ইয়াৰ ফলত এজন নিবনুৱা প্ৰাৰ্থীয়ে ৪০০০/৫০০০ টকা খৰচ কৰিব লাগিব ৷ যুৱতী প্ৰাৰ্থীসকল অধিক কষ্টৰ সন্মুখীন হ’ব ৷ এনে বহু প্ৰাৰ্থী আছে যিসকলে টকাৰ অভাবৰ বাবে দূৰণিৰ জিলালৈ গৈ পৰীক্ষাত অৱতীৰ্ণ হ’ব নোৱাৰিব ৷ এজন প্ৰাৰ্থীক নিজৰ জিলাতেই পৰীক্ষা কেন্দ্ৰৰ ব্যৱস্থা কৰিব নোৱাৰাৰ কোনো যুক্তি নাই ৷
সেয়া সম্ভৱ নহ’লেও কাষতে থকা জিলাসমূহত পৰীক্ষা কেন্দ্ৰৰ ব্যৱস্থা কৰিব পাৰে ৷ কিন্তু স্বাস্থ্য বিভাগৰ পৰীক্ষাৰ বাবে সেয়াও কৰা নহ’ল ৷ পৰৱৰ্তী সময়ত ৰাজ্যৰ চাৰি লাখ নিবনুৱাই পিয়ন-চকীদাৰ আদি পদৰ পৰীক্ষাত অৱতীৰ্ণ হ’ব ৷ উল্লেখনীয় যে অসম চৰকাৰে তৃতীয় আৰু চতুৰ্থ বৰ্গৰ পদৰ চাকৰিত আৱেদন মাচুল হিচাপে ইতিমধ্যে ৪০ কোটিতকৈ অধিক টকা সংগ্ৰহ কৰিছে ৷ আৱেদনৰ নামতে প্ৰাৰ্থীসকলে বহু টকা খৰচ কৰিবলগীয়া হৈছে ৷ পুনৰ পৰীক্ষাৰ নামত খৰচ কৰিবলগীয়া হোৱাটো ডাঙৰ বোজা হিচাপে বিবেচিত হৈছে ৷
