গুৱাহাটী, 28 অক্টোবৰ : "এয়া আকাশবাণী, বাতৰি পঢ়িছো অৱন বৰপূজাৰীয়ে..." । আশীৰ দশকৰ পৰা নব্বৈৰ দশকৰ মধ্যভাগলৈকে অসমৰ গাঁৱে-ভূঞে প্ৰায় সকলোৰে ঘৰে ঘৰে থকা ৰেডিঅ'টোত ভাহি আহিছিল গলগলীয়া এই পৰিচিত কন্ঠ । ৰেডিঅ'ৰ বাতৰি মানেই যেন অৱন বৰপূজাৰী, লিলি দাস মালিক আৰু গুণ বৰুৱা ।
কোনজন অসমীয়াই শুনা নাই এওঁলোকৰ কন্ঠ ! সেই বিখ্যাত কন্ঠৰ অধিকাৰী অৱন বৰপূজাৰী আৰু নাই ৷ বৃহস্পতিবাৰে চিৰদিনলৈ হেৰাই গ’ল শ্ৰোতাৰ প্ৰিয় কণ্ঠৰ অধিকাৰী অৱন বৰপূজাৰী ।
স্তব্ধ হ'ল অৱন বৰপূজাৰীৰ সেই পৰিচিত গলগলীয়া কন্ঠ ।
নবৈ দশকতেই তেওঁ দিল্লীৰ পৰা আঞ্চলিক বাতৰি পঢ়িছিল ৷ পৰৱৰ্তী সময়ত আকাশবাণী গুৱাহাটীৰ পৰা পৰিবেশন কৰিছিল অসমীয়া বাতৰি ৷ তেওঁ অৱসৰ গ্ৰহণ কৰিছিল 2002 চনত ৷
দীৰ্ঘদিন ধৰি অসুস্থ হৈ চিকিৎসাধীন অৱস্থাত আছিল অৱন বৰপূজাৰী ৷ বৃহস্পতিবাৰে পুৱা প্ৰায় পাঁচ বজাত গুৱাহাটীৰ ডাউন টাউন হাস্পতালত শেষ নিস্বাস ত্যাগ কৰে অৱন বৰপূজাৰীয়ে । মৃত্যুৰ সময়ত তেওঁৰ বয়স আছিল ৮২ বছৰ ।
লগতে পঢ়ক : বেলতলা হত্যাকাণ্ড: গ্ৰেপ্তাৰ হ’ব পাৰে আকাশ চৌধুৰীৰ পত্নী
