নিউজ ডেস্ক, 12 ছেপ্তেম্বৰ : গংগোত্ৰী-কেদাৰনাথক সংযুক্ত কৰা ‘উড়ান কোল পাচ’ত সফলতাৰে ট্ৰেকিং সম্পূৰ্ণ কৰিলে অসমৰ 9 জনীয়া ট্ৰেকাৰৰ দলে ৷ কৰ’ণাৰ প্ৰকোপ কিছু হ্ৰাস পোৱাৰ পিছতে পুনৰ খুলি দিয়া হৈছে দুঃসাহসিক ক্ৰীড়া আৰু ট্ৰেকিং ৷ ইয়াৰ পিছতে বিভিন্ন স্থানীয় ট্ৰেকিং সংস্থাৰ সহযোগত 5400 মিটাৰ উচ্চতাত অৱস্থিত গংগোত্ৰী-কেদাৰনাথক সংযুক্ত কৰা ‘উড়ান কোল পাচ’ আৰু 5940 মিটাৰ উচ্চতাত অৱস্থিত গংগোত্ৰী বদ্ৰীনাথক সংযুক্ত কৰা ‘কালিন্দী লখাল পাচ’ত সফলতাৰে ট্ৰেকিং সম্পূৰ্ণ কৰা হয় ৷
‘উড়ান কোল পাচ’ৰ ট্ৰেকিঙত অসমৰ 9 গৰাকী ট্ৰেকাৰৰ লগতে ‘কালিন্দী লখাল পাচ’ৰ ট্ৰেকিঙত পশ্চিমবংগৰ 10 গৰাকী ট্ৰেকাৰ আছিল ৷ 2019 চনত সফলতাৰে সম্পন্ন হোৱা উড়ান কোল পাচৰ ট্ৰেকিঙৰ পাছত এইটো প্ৰথম ট্ৰেকিং ৷ উত্তৰ হিমালয় হলিডে ট্ৰেকিঙৰ সংযোজক মনোজ ৰাৱটে জনোৱা অনুসৰি গংগোত্ৰী-কেদাৰনাথক সংযুক্ত কৰা 5,400 মিটাৰ উচ্চতাত অৱস্থিত উড়ান কোল পাচ ট্ৰেকৰ বাবে স্থানীয় গাইডৰ সৈতে 28 আগষ্টত অসম আৰু বেংগলৰ 9 গৰাকী ট্ৰেকাৰ গংগোত্ৰীলৈ ৰাওনা হয় ৷
ইয়াৰ মাজতে প্ৰতিকুল বতৰৰ সন্মুখীন হৈও ট্ৰেকাৰসকলে 5 ছেপ্তেম্বৰত গুট্টুত উড়াল কোল পাচৰ ট্ৰেকিং সফলতাৰে সম্পূৰ্ণ কৰে ৷ 2019 চনৰ পিছত গংগোত্ৰী ঘাটৰ ট্ৰেকিঙৰ এইটোৱেই সফল অভিযান ৷
আনহাতে, মাউন্ট হাই উইণ্ড ট্ৰেকিং এজেঞ্চিৰ সংযোজক জয়েন্দ্ৰ পৱাৰে কয় যে, গংগোত্ৰী-বদ্ৰীনাথক সংযুক্ত কৰা 5,940 মিটাৰ উচ্চতাত অৱস্থিত কালিন্দী খাল পাচৰ ট্ৰেকিঙৰ বাবে বিগত 31 আগষ্টত কলকাতাৰ 10 গৰাকী ট্ৰেকাৰ গংগোত্ৰীলৈ ৰাওনা হয় ৷ এই দলটোৱে যোৱা শুকুৰবাৰে বদ্ৰীনাথত উপস্থিত হৈ এই কঠিন ট্ৰেকিং সফলতাৰে সম্পূৰ্ণ কৰে ৷ এই দলটোও কালিন্দী খাল ট্ৰেক পাৰ কৰা 2019 চনৰ পিছত প্ৰথমটো দল ৷ দেওবাৰে এই দলটো উত্তৰকাশীত উপস্থিত হোৱাৰ সম্ভাৱনা আছে ৷
লগতে পঢ়ক : তৃতীয় পৰ্যায়ৰ লোক আদালতত অভিলেখ সংখ্যক গোচৰৰ নিষ্পত্তি
