1 বজাৰ 10টা শীৰ্ষ সংবাদ

1 বজাৰ 10টা শীৰ্ষ সংবাদ

আৰম্ভণিতেই উত্তাল হৈ পৰে বিটিচিৰ সদন ৷ হাতত প্লে’ কাৰ্ড লৈ অধ্যক্ষৰ আসনৰ ওচৰত প্ৰতিবাদমুখৰ হৈ পৰিল বিপিএফৰ কাৰ্যবাহীসকল ৷ পৰিস্থিতি উত্তপ্ত হৈ পৰাত অধ্যক্ষই 10 মিনিটৰ বাবে স্থগিত ৰাখে সদন ৷

অসমৰ নতুন অঞ্চলিক দলে বৰাক উপত্যকাত এখন আসন দখল কৰিলে বিজেপৰ কার্যকর্তা সকলে পদত্যাগ কৰিব। দ্বিতীয় দিনৰ কাৰ্যসূচীৰ আৰম্ভণিতে এই মন্তব্য কৰিলে ৰাজ্যিক বিজেপিৰ সভাপতি ৰঞ্জিত দাসে ।

শোণিতপুৰ জিলাত হাতী-মানুহৰ সংঘাতৰ ফলত 4 জন লোকক বনৰীয়া হাতীয়ে হত্যা কৰাৰ লগতে মৃত্যু হয় 3 টাকৈ হাতীৰ ৷ প্ৰয়োজনতকৈ বন কৰ্মীৰ যথেষ্ট কম হোৱাৰ বাবে হাতী-মানুহৰ সংঘাতৰ সৈতে বন বিভাগে কেনেদৰে মোকাবিলা কৰিব তাক লৈ শংকিত বন বিষয়া ৷ আনহাতে, 2009 চনৰ পৰা চলিত বৰ্ষৰ 25 ছেপ্টেম্বৰৰ ভিতৰত বিদ্যুৎস্পৃষ্ট হৈ ৰাজ্যত 113 টা হাতীৰ মৃত্যু হয় ৷

সংখ্যাগৰিষ্ঠতা প্ৰমাণৰ বাবে বৃহস্পতিবাৰে বিটিচিত অনুষ্ঠিত হ'ব আস্থা ভোটৰ । ইয়াক লৈয়ে এতিয়া অভিজাত হোটেলত ইখনৰ পিচত সিখন মাৰাথন বৈঠকত মিলিত হৈছে বিজেপি,ইউপিপিএল তথা নৱ নিৰ্বাচিত পাৰিষদসকল ৷

উগ্ৰপন্থী সংগঠনৰ পৰা ধন দাবীৰ পত্ৰ পাই PMGYS আঁচনিৰ অধিনত পথ নিৰ্মাণৰ কাম মাজতেই সামৰিলে এইচপিএছআৰ জয়েণ্ট ভেঞ্চাৰ নামৰ নিৰ্মাণ সংস্থাই । ডিমা হাছাও জিলাৰ ডিডিৰোডৰ পৰা পালাইফাহাডি গাঁৱলৈকে PMGYSৰ অধীনত সংযোগী পথ আৰু দিয়ুং নদীৰ ওপৰত দুখন কৈ আৰচিচি দলং নিৰ্মাণৰ 2019 চনৰ 4 ফেব্ৰুৱাৰীত দায়িত্ব লাভ কৰিছিল সংস্থাটোৱে ৷

কাকপথাৰৰ সমীপৰ ডাঙৰী ন-পথাৰত অব্যাহত আছে গৰু চোৰৰ তাণ্ডৱ ৷ বুধবাৰে নিশা তিনিটাকৈ গৰু চোৰ কৰি গৈ থাকোতে স্থানীয় ৰাইজে আটক কৰে গাড়ীসহ দুই গৰু চোৰক ৷ নিশায়ে স্থানীয় ৰাইজে দুই চোৰক উত্তম মধ্যম শোধাই চমজাই দিয়ে স্থানীয় আৰক্ষীৰ হাতত ৷

বিলাসীপাৰা কামাৰডিহিৰ আব্দুছ ছোবাহান নামৰ BSF জোৱানৰ ঘৰত বুধবাৰে নিশা সংঘটিত হয় ডকাইতি কাণ্ড ৷ নগদ ধন,সোন-ৰূপৰ আ-অলঙ্কাৰ আৰু সা-সামগ্ৰী লুটি লৈ পলায়নৰ চেষ্টা কৰে যদিও স্থানীয় ৰাইজে আৱদ্ধ কৰে ৪টা ডকাইতক ৷ আটকাধীন ডকাইত কেইজনক গতাই দিয়ে শালকোচা আৰক্ষীক ৷

মাজুলী জিলাৰ উজনি মাজুলীৰ কথমিয়া অঞ্চলৰ বামুনপুখুৰী উচ্চ মাধ্যমিক ইংৰাজী বিদ্যালয়ৰ দুৰৱস্থা ৷ এগৰাকী শিক্ষয়িত্ৰীৰ জৰিয়তে দীৰ্ঘদিনৰ পৰা শিক্ষাদান চলি আছে বামুনপুখুৰী উচ্চ মাধ্যমিক ইংৰাজী বিদ্যালয়ত ৷ বিদ্যালয়খনত প্ৰয়োজনীয় শিক্ষক নিযুক্তি দিবলৈ চৰকাৰক দাবী জনাইছে অভিভাৱক আৰু অঞ্চলটোৰ সচেতন মহলে ৷

নতুন কৃষি আইনৰ বিৰোধিতাৰে ৰাহুল গান্ধীৰ নেতৃত্বত দিল্লীৰ বিজয় চকৰ পৰা ৰাষ্ট্ৰপতি ভৱনলৈ কংগ্ৰেছ সাংসদসকলৰ ৰেলী প্ৰদৰ্শন । ৮ ডিচেম্বৰত গৃহমন্ত্ৰী অমিত শ্বাহে ক্ষুদ্ধ কৃষক সংঘৰ ১৩ জনীয়া সদস্যৰ সৈতে আলোচনাত মিলিত হৈছিল । বৃহস্পতিবাৰে ৰাষ্ট্ৰপতি ৰামনাথ কোৱিন্দক এখনি স্মাৰক পত্ৰ প্ৰেৰণ কৰিব ।

জম্মু-কাশ্মীৰৰ বাৰমুল্লা জিলাত নিৰাপত্তাৰক্ষী আৰু সন্ত্ৰাসবাদীৰ মাজত সংঘৰ্ষ ৷ বাৰমুল্লা জিলাৰ ৱানিগাম পায়ীন ক্ৰীৰি অঞ্চলত সংঘটিত হৈছে এই গুলীয়াগুলি ৷ আৰক্ষীৰ সূত্ৰই প্ৰকাশ কৰা অনুসৰি বৃহস্পতিবাৰে পুৱাতেই আৰম্ভ হয় এই গুলীয়াগুলি ৷ আৰক্ষী আৰু নিৰাপত্তাৰক্ষীয়ে বৰ্মানেও অব্যাহত ৰাখিছে অভিযান ৷