টীয়ক , 30 অক্টোবৰঃ কাঠফুলৰ দৰে বৃদ্ধি পাই অহা মাইক্ৰ'ফাইনেঞ্চ প্ৰতিষ্ঠানৰ লুণ্ঠনৰাজৰ পৰা গাঁৱৰ বহু পৰিয়ালে সৰ্বস্ব হেৰুৱাই পেলাবলগীয়া পৰিস্থিতিৰ সৃষ্টি হৈছে সমগ্ৰ ৰাজ্যত ৷ গাঁৱৰ মহিলা সকলক লৈ এই বিত্তীয় প্ৰতিষ্ঠান সমূহে ১০-১৫ জনীয়া গোট গঠন কৰি অতি সহজতে ঋণ প্ৰদান কৰে আৰু সহজলভ্য ধনৰ লোভত কিছু পৰিয়ালে ঘৰৰ আচবাব, টিভি, কাঁহী-বাতি বিক্ৰী কৰি পৰৱৰ্তী পৰ্যায়ত পৰিশোধ কৰিব লগা হয় ঋণসমূহৰ কিস্তি ৷
এই মাইক্ৰ'ফাইনেঞ্চ প্ৰতিষ্ঠান সমূহৰ হাতৰ পৰা পৰিত্ৰাণ পাবৰ উদ্দেশ্যে আজি যোৰহাট জিলাৰ টীয়কৰ বনাই ৰবিবৰুৱা গাঁও , নপমুৱা, চিন্তামণিগড় আদি বিভিন্ন অঞ্চলৰ প্ৰায় ২০০ মহিলা একগোট হৈ এখন ৰাজহুৱা সভা অনুষ্ঠিত কৰে । মামণি দেৱী, জোনমণি গগৈ, জানমণি বৰুৱাৰ নেতৃত্ব আয়োজন কৰা সভাত পৰৱৰ্তী সময়ত সেই অঞ্চলৰ মহিলাসকলে কোনো মাইক্ৰ'ফিনেন্স প্ৰতিষ্ঠানকে ঋণৰ কিস্তি ঘূৰাই নিদিয়াৰ সিদ্ধান্ত গ্ৰহণ কৰে ।
উল্লেখযোগ্য যে, সেই অঞ্চলৰ ৰুণু ভূঞা নামৰ কেঞ্চাৰ ৰোগী এগৰাকীক বন্ধন আৰু উজ্জীৱন নামৰ মাইক্ৰ'ফাইনেঞ্চ প্ৰতিষ্ঠানৰ কৰ্মচাৰীয়ে সন্তান বিক্ৰী কৰি হ'লেও ঋণৰ কিস্তি আদায় দিবলৈ হেঁচা দিছে বুলি অভিযোগ তুলিছে মহিলাসকলে । তদুপৰি আন এটা প্ৰতিষ্ঠানৰ মহিলা কৰ্মচাৰী এগৰাকীয়ে ঋণ আদায় দিব নোৱাৰাত প্ৰতিষ্ঠানটোৱে মহিলাগৰাকীক আত্মহত্যা কৰক বুলি অভব্য আচৰণ কৰাৰো অভিযোগ উত্থাপন হৈছে ৷ মাইক্ৰ'ফাইনেঞ্চ প্ৰতিষ্ঠানসমূহৰ ওপৰত চৰকাৰে অতি শীঘ্ৰে ব্যৱস্থা গ্ৰহণ নকৰিলে পৰৱৰ্তী সময়ত জংগী আন্দোলন গঢ়ি তোলা হ'ব বুলি মন্তব্য কৰে সভাত উপস্থিত মহিলা সকলে ৷
লগতে পঢ়কঃ কংগ্ৰেছৰ প্ৰতিবাদত কঁপিল নুমলীগড়
