যোৰহাট, 27 মাৰ্চ : আকৌ গামোচা বিতৰ্ক (Gamocha Controversy in Assam) ৷ অসমীয়া আৰু বঙালী গামোচা জোৰা লগাই সমন্বয়ৰ প্ৰতীক বুলি অভিহিত কৰিছে ৰাজ্য চৰকাৰে ৷ আনকি এই গামাচোৰ বিকৃতকৰণক এচামে আকৌ শলাগ জনাইছে ৷ যাক লৈ এতিয়া বিভিন্ন মহলত সৃষ্টি হৈছে তীব্ৰ প্ৰতিক্ৰিয়াৰ ৷ পুনৰ বিতৰ্কলৈ অনা অসমীয়াৰ স্বাভিমান গামোচাৰ এনে ৰূপ সন্দৰ্ভত সোমবাৰে যোৰহাটত বীৰ লাচিত সেনা, অসমে ব্যক্ত কৰিছে নিজৰ প্ৰতিক্ৰিয়া (Veer Lachit Sena Assam reacts on Assamese Gamocha Controversy)৷
সংবাদ মাধ্যমৰ আগত বীৰ লাচিত সেনা অসমৰ কেন্দ্ৰীয় সমিতিৰ মুখপাত্ৰ সিদ্ধাৰ্থ বৰুৱাই কয়, ‘‘অসমীয়া স্বাভিমান গামোচাক বিকৃত কৰা কাৰ্যক কোনোপধ্যেই গ্ৰহণ নকৰে বীৰ লাচিত সেনা অসমে ৷ প্ৰকৃততে সেইখন সমন্বয়ৰ গামোচা নহয় ৷ সেইখন হৈছে এখন ফটোৱা কাপোৰহে ৷ যদি এইমূহুৰ্তত পালো হয়, সেইখন জ্বলাই দিলো হয় ৷ এনেকুৱা সমন্বয় আমাক নালাগে ৷ আমাৰ যিখন গামোচা, সেইখনক গামোচা হৈ থাকিবলৈ দিয়ক ৷ অসমীয়াৰ গামোচা অসমীয়াৰ আৰু বঙালীৰ গামোচা বঙালীৰ হৈ থাকিব দিয়ক’’ ৷
ইফালে এই দুই ৰঙী গামোচা সন্দৰ্ভত দেওবাৰে অসমৰ এগৰাকী বিশিষ্ট সাহিত্যিকে এক তুলুঙা মন্তব্য প্ৰদান কৰিছিল ৷ আনকি এয়া সমন্বয়ৰ কথাহে বুলি কৈছিল সাহিত্যিকগৰাকীয়ে ৷ এই সন্দৰ্ভত প্ৰতিক্ৰিয়া ব্যক্ত কৰি সিদ্ধাৰ্থ বৰুৱাই কয়, ‘‘যিগৰাকী সাহিত্যিকৰ লিখনি পঢ়ি আমি ভাল পাওঁ ৷ তেনে এগৰাকী সাহিত্যিকে এনে মন্তব্য কৰাৰ পৰা বিৰত থাকিব লাগে’’ ৷
ইয়াৰ উপৰিও বীৰ লাচিত সেনা অসমৰ যোৰহাট জিলা সমিতি সভাপতি আদিত্য পানী ফুকনে কয়, ‘‘সৰু ল’ৰা-ছোৱালীক শিকাবলৈ ভাল ৷ কিন্তু মূৰ্খৰ স্বৰ্গত বাস কৰাৰ দৰে কথা তেওঁলোকে কৈছে ৷ প্ৰথমে তেওঁলোকে নিজৰ বিভাগটোক কন্ট্ৰ’ল কৰিবলৈ শিক্ষক ৷ ৰণোজ পেগুৱে নিজৰ শিক্ষা বিভাগটোকে চম্ভালিব পৰা নাই ৷ তেওঁ আকৌ গামোচাত সমন্বয় কৰে বা গামোচা সন্দৰ্ভত ভেঙুচালি কৰে ৷ সেয়া কেতিয়াও সহ্য কৰা নহ’ব’’ ৷ লগতে তেওঁ কয়, ‘‘বিহ্যহীন কাপুৰুষৰ দৰে মন্তব্য নকৰিব’’ ৷
ইফালে এই বিতৰ্কিত গামোচাখন সন্দৰ্ভত বীৰ লাচিত সেনা অসমৰ যুটীয়া সাংগঠনিক সচিব মৃনাল দত্তই কয়, ‘‘অসমীয়া-বঙালীৰ মাজত সমন্বয় আছেই ৷ কিন্তু যিখন গামোচাৰে সমন্বয় গঢ়িবলৈ লৈছে চৰকাৰে, সেইখন সমন্বয় নহয়, অসমীয়া বঙালীৰ মাজত যুদ্ধৰহে সৃষ্টি কৰিছে ৷ ইয়াক ৰাজনৈতিক ষড়যন্ত্ৰ বুলিহে অভিহিত কৰিব পাৰি’’ ৷
আনহাতে অসমীয়া গামোচাক বিৰ্তকিতভাৱে উপস্থাপন কৰা লৈ বীৰ লাচিত সেনা অসমে আগন্তুক সময়ত গুৱাহাটীত এখন নাগৰিক সভা অনুষ্ঠিত কৰিব বুলিও মন্তব্য কৰে বীৰ লাচিত সেনা অসমৰ বিষয়ববীয়াই । লগতে বহিৰাগত গামোচাক লৈ যদি চৰকাৰে কোনো ধৰণৰ ব্যৱস্থা গ্ৰহণ নকৰে তেতিয়া হ’লে বীৰ লাচিত সেনাই ব্যৱসায়ীক প্ৰতিষ্ঠানৰ পৰা উক্ত গামোচাখিনি ৰাজপথত জ্বলাই দিয়াৰো হুংকাৰ প্ৰদান কৰে ।
লগতে পঢ়ক : Assam Arunachal Border Issue: সমাধান হ'ব অসম অৰুণাচলৰ সীমা সমস্যা: বিধায়ক কাংগং টাকু
