টীয়ক,27 এপ্ৰিল: সমগ্ৰ দেশতে কৰ’ণা আক্ৰান্তৰ সংখ্যা বৃদ্ধি পোৱাত দেশৰ লগতে ৰাজ্যতো এক ভয়াৱহ পৰিস্থিতিৰ সৃষ্টি হৈছে ৷ ৰাজ্যৰ বিভিন্ন প্ৰান্তৰ লগতে যোৰহাটতো কৰ’ণা আক্ৰান্তৰ সংখ্যা বঢ়াত ৰাজ্য চৰকাৰৰ অধিসূচনা মৰ্মে যোৰহাট জিলাত মঙলবাৰৰে পৰা কাৰ্যকৰী হোৱাকৈ ষষ্ঠ শ্ৰেণীৰ পৰা অষ্টম শ্ৰেণীলৈকে পাঠদান বন্ধ ঘোষণা কৰে ৷ এই ঘোষণাক কেন্দ্ৰ কৰি টীয়কৰ বিদ্যালয়সমূহত এক আহুকলীয়া পৰিস্থিতিৰ সৃষ্টি হয় ।
সোমবাৰে নিশা জিলা উপায়ুক্তৰ এই সম্পৰ্কীয় নিৰ্দেশনাত বিদ্যালয় প্ৰধান সকলে ছাত্ৰ-ছাত্ৰীসকলক নিশাই তেওঁলোকৰ হোৱাটছ এপ গ্ৰুপত অৱগত কৰিছিল ৷ যদিও বহু ছাত্ৰ-ছাত্ৰীৰ এনৰয়ড ম'বাইল নথকাৰ বাবে এই নিৰ্দেশনাৰ বিষয়ে অৱগত হোৱা নাছিল ৷ সেয়েহে মঙলবাৰে পুৱা এইসকল ছাত্ৰ-ছাত্ৰী বিদ্যালয়ত আহি ওভতি যাবলগীয়া হয় ।
উল্লেখ্য যে, যোৰহাটৰ এচাম সচেতন অভিভাৱকে বাৰম্বাৰ এখনৰ পাছত আন এখন নিৰ্দেশনা জাৰি কৰাতকৈ ক’ভিড পৰিস্থিতি নিয়ন্ত্ৰণ নোহোৱা পৰ্যন্ত বিদ্যালয়সমূহৰ পাঠদান বন্ধ কৰি দিবলৈ আহ্বান জনায় ।
লগতে পঢ়ক : মঙলবাৰৰ পৰা কামৰূপ(ম)ত স্কুল-কলেজ, হোষ্টেল, ক'চিং চেন্টাৰৰ বন্ধ ঘোষণা
