টীয়ক,3 ছেপ্তেম্বৰঃ বাগানত গণ প্ৰহাৰত প্ৰাণ হেৰুওৱা ডা: দেবেন দত্তৰ হত্যাৰ প্ৰতিবাদত সোমবাৰে টীয়কত এখন ৰাজহুৱা সভা অনুষ্ঠিত হয় ৷ উক্ত সভাত যোৰহাট জিলাৰ উপায়ুক্ত,যোৰহাট জিলাৰ আৰক্ষী অধীক্ষক,টীয়ক ৰাজহ চক্ৰ বিষয়া ,টীয়ক পৌৰসভাৰ পৌৰপতি, টীয়ক প্ৰেছ ক্লাবৰ বিষয়ববীয়াসকলকে প্ৰমুখ্য কৰি বৃহত্তৰ টীয়ক অঞ্চলৰ ভালেসংখ্যক সমাজ সচেতন ব্যক্তি উপস্থিত থাকে ৷ সভাত উপস্থিত থাকি সকলোৱে একেমুখে দোষীক উপযুক্ত শাস্তি দিবলৈ দাবী জনায় ৷ লগতে সভাৰ অন্তত জিলা উপায়ুক্ত আৰু আৰক্ষী অধীক্ষকসহ কেইবাজনো প্ৰশাসনিক বিষয়াই মৃত ডা: দেবেন দত্তৰ ঘৰত উপস্থিত হৈ শোকসন্তপ্ত পৰিয়ালক সমবেদনা জ্ঞাপন কৰে ৷
উল্লেখযোগ্য যে এই ৰাজহুৱা সভাত অসম চাহ জনজাতি ছাত্ৰ সন্থাৰ কেন্দ্ৰীয় সমিতিৰ সাধাৰণ সম্পাদক পৱন বেদীয়া উপস্থিত হৈ সমগ্ৰ ঘটনাটো তীব্ৰ ভাষাৰে গৰিহণা জনায়৷ লগতে সভাৰ অন্তত জগদুৱাৰস্থিত ফুড ভিল্লাত এক সংবাদ মেল সম্বোধন কৰি তেওঁ কয় যে অপৰাধীৰ কোনো জাতি ধৰ্ম বৰ্ণ নাই, সেয়ে অসমৰ সন্মান ৰক্ষাৰ স্বাৰ্থত সকলো একত্ৰিত হৈ দোষীক কৰায়ত্ব কৰাত প্ৰশাসনক সহযোগিতা কৰিবলৈ আহ্বান জনায় ৷ আনহাতে ঘটনাটোত মৰ্মান্তিকভাৱে মৃত্যুক সাৱটি ল'ব লগা হোৱা ডা: দেবেন দত্তৰ আত্মাৰ সদগতিৰ তথা পৰিয়ালৰ প্ৰতি সমবেদনা জনোৱাৰ উদ্দেশ্যে মঙলবাৰে যোৰহাট জিলাৰ চাহ বাগানসমূহ এটা বেলাৰ বাবে বন্ধ ৰাখি প্ৰতিখন বাগানতে শ্ৰদ্ধাঞ্জলি অনুষ্ঠান অনুষ্ঠিত কৰি এনে ঘটনাৰ পুনৰাবৃত্তি নহ'বলৈ সজাগতা সভা আয়োজন কৰিব বুলিও জানিবলৈ দিয়ে ৷
