যোৰহাট, 17 জুনঃ যোৰহাটৰ এখন বিদ্যালয়ৰ নাম ফলকৰ ক্ষেত্ৰত শিক্ষা বিভাগে দিয়া এক নিৰ্দেশনাই প্ৰতিবাদমুখৰ কৰি তুলিছে প্ৰাক্তন শিক্ষাৰ্থী সকলক ৷ ১৮৯৬ চনতে যোৰহাটৰ ১০ নং ৱাৰ্ডত প্ৰতিষ্ঠা হোৱা শতবৰ্ষ গৰকা মকতব্ আদৰ্শ প্ৰাথমিক বিদ্যালয়ে লাভ কৰিছে ৰাষ্ট্ৰপতি পদকো ৷ অসমৰ বহু স্বনামধন্য ব্যক্তিয়ে অধ্যয়ণ কৰি গৈছে এই মকতব্ আদৰ্শ প্ৰাথমিক বিদ্যালয়ত ৷ আনকি বৰ্তমানৰ মূখ্য সচিব কুমাৰ সঞ্জয় কৃষ্ণইয়ো নিজৰ প্ৰাথমিক শিক্ষা সম্পন্ন কৰিছিল এইখন বিদ্যালয়তে ৷
হঠাৎ শিক্ষা বিভাগে প্ৰদান কৰা এক নিৰ্দেশনাই এতিয়া ক্ষোভিত কৰি তুলিছে যোৰহাটৰ সচেতন ৰাইজ তথা প্ৰাক্তন ছাত্ৰ-ছাত্ৰী সকলক ৷ প্ৰাথমিক শিক্ষা বিভাগে প্ৰদান কৰা নিৰ্দেশনা মতে, বিদ্যালয়খনে আঁতৰাই দিব লাগে মকতব শব্দটো ৷ তেওঁলোকৰ মতে, মকতব শব্দটো থাকিলে হেনো ছাত্ৰ-ছাত্ৰীসকলে কোনো উচ্চ শিক্ষা প্ৰতিষ্ঠানত আসন নাপায় ৷ এনে ধৰণৰ কিছুমান বিষয় উল্লেখ কৰি শিক্ষা বিভাগৰ তৰফৰ পৰা নিৰ্দেশনা আহে জিলা প্ৰাথমিক শিক্ষা বিষয়ালৈ ৷ যাক লৈ ক্ষোভিত প্ৰাক্তন ছাত্ৰ-ছাত্ৰী তথা স্থানীয় ৰাইজে বুধাবাৰে বিদ্যালয়খনৰ সন্মুখত সাব্যস্ত কৰে প্ৰতিবাদ ৷
লগতে পঢ়কঃ শিক্ষাৰ্থীক সাম্প্ৰতিক প্ৰযুক্তিৰ সৈতে মোকাবিলা কৰিবলৈ আহিলা প্ৰদানৰ দাবী গৌৰৱ গগৈৰ
