যোৰহাট, 27 জুলাই : যোৰহাট জিলাত বিগত প্ৰায় এটা মাহ লক ডাউন বাহাল থকাত একমাত্ৰ জৰুৰী সেৱা বাহিৰে অন্যান্য ব্যৱসায় বাণিজ্য সম্পূৰ্ণ ৰূপত বিধ্বস্ত হৈ পৰিছে । দৰিদ্ৰ লোকৰসকলৰ লগত আৰ্থিকভাৱে টনকিয়াল নোহোৱা পৰিয়াল এতিয়া জীয়াই থাকিবলৈ নোৱাৰা অৱস্থা হৈছে । যাৰবাবে মঙলবাৰে উজনি অসম চেম্বাৰ্ছ অৱ কৰ্মাছে যোৰহাট জিলাত এখন সংবাদমেলৰ আয়োজন কৰে । সংবাদমেলত উজনি অসম চেম্বাৰ্ছ অৱ কৰ্মাছে ব্যৱসায়িক প্ৰতিষ্ঠানসমূহ দুপৰীয়া ১২ বজাৰ পৰিবৰ্তে বিয়লি ৩ বজালৈকে খোলাৰ বাবে ব্যৱস্থা গ্ৰহণৰ দাবী জনায় ।
উল্লেখ্য যে, যোৰহাট জিলাৰ পৰাই উজনি অসমৰ কেইবাখনো জিলালৈ খাদ্য সামগ্ৰীৰ লগতে অন্যান্য সামগ্ৰীৰ পাইকাৰী ব্যৱসায় চলি আহিছে । কিন্তু চৰকাৰে দিনৰ ১২ বজাৰলৈকে ব্যৱসায়িক প্ৰতিষ্ঠান খোলাৰ নিৰ্দেশ দিয়াত হাহাকাৰ অৱস্থাৰ সৃষ্টি হৈছে ব্যৱসায়ীসকলৰ মাজত ৷ সেয়ে উজনি অসম চেম্বাৰ্ছ অৱ কৰ্মাছে চৰকাৰক বিয়লি ৩ বজালৈকে সকলো খোলা ৰাখিব পৰাকৈ নতুন নিৰ্দেশনা জাৰি কৰিবলৈ অনুৰোধ জনাইছে ।
ইয়াৰ উপৰিও উজনি অসম চেম্বাৰ্ছ অৱ কৰ্মাছে চৰকাৰক আন্তঃজিলা অন্তত সপ্তাহত দুটা দিন মুকলি কৰি দিয়াৰ ব্যৱস্থা কৰাৰ বাবে আহ্বান জনায় । তেওঁলোকে ৰাজ্য চৰকাৰে এই বিষয়টো গুৰুত্ব দিয়াৰ বাবে আহ্বান জনায় ৷ অন্যথা যোৰহাট জিলা এক ভয়ংকৰ অৱস্থা লৈ গতি কৰিব বুলি চেম্বাৰ্ছ অৱ কৰ্মাছে উল্লেখ কৰে ৷
উজনি অসম চেম্বাৰ্ছ অৱ কৰ্মাছে মুখ্যমন্ত্ৰীক নতুনকৈ নিৰ্দেশনা জাৰি কৰি লক ডাউনৰ ক্ষেত্ৰত কিছু শিথিলতা অনাৰ বাবে অনুৰোধ জনায় । সংবাদমেলত উজনি অসম চেম্বাৰ্ছ অৱ কৰ্মাছৰ হৈ দিলীপ আগৰৱালা, মাখন গটানি, ধুলিচন্দ আগৰৱালা আৰু অশোক মালপানী উপস্থিত থাকে ৷
লগতে পঢ়ক : তপতজুৰিৰ 18 টাকৈ বন্যহস্তীৰ মৃত্যু সন্দৰ্ভত জামিনবিহীন গোচৰ ৰুজু
