টীয়ক, 20 ছেপ্তেম্বৰ: যোৰহাট জিলাৰ টীয়ক সমষ্টিৰ 4 নং বামুণ পুখুৰী গাঁও পঞ্চায়তৰ অন্তৰ্গত 37 নং ৰাষ্ট্ৰীয় ঘাইপথৰ পৰা চৰাইমৰীয়া-বামুনপুখুৰী তুলসীজান সংযোগী পথটোৰ দুৰাৱস্থাই জ্বলা-কলা খুৱাইছে অঞ্চলবাসীক ৷
ৰাইজৰ অভিযোগ অনুসৰি, বিগত বৰ্ষৰ ২২ জানুৱাৰীত টীয়ক সমষ্টিৰ বিধায়িকা ৰেনুপমা ৰাজখোৱাই ঢাক-ঢোল বজাই পথটোৰ আধাৰশিলা স্থাপন কৰিছিল ৷ গড়কাপ্তানি বিভাগৰ যোৰহাট গ্ৰাম্য পথ সংমণ্ডলৰ দ্বাৰা SOPD(G) আঁচনিৰ অধীনত নিৰ্মাণ কৰিবলগীয়া পথটোৰ আধাৰশিলা স্থাপনতে দায়িত্ব সামৰিলে বিধায়িকা ৰেনুপমা ৰাজখোৱাই ৷
বিধায়িকা গৰাকীৰ অমনোযোগিতাৰ লগতে সংশ্লিষ্ট বিভাগৰ বিষয়া-কৰ্মচাৰী আৰু ঠিকাদাৰৰ অকৰ্মণ্যতাৰ বাবে আজি পৰ্যন্ত পথটো নিৰ্মাণৰ কাম নবঢ়াৰ অভিযোগ তুলিছে স্থানীয় ৰাইজে ৷ আধাৰশিলা স্থাপনৰ পাছতে কেইগাড়ীমান মাটি আৰু শিলগুটি পেলায়েই দ্বায়িত্ব সামৰাৰ পাচত আধৰুৱা হৈ ৰয় পথ নিৰ্মাণৰ কাম ৷
ইয়াৰ ফলস্বৰূপে এজাক বৰষুণতে পথটো ঠায়ে ঠায়ে একাঠু দ গাঁত, বোকাময় হৈ গো-বাটলৈ ৰূপান্তৰিত হৈছে ৷ সেয়েহে সমাগত বিধানসভা নিৰ্বাচনৰ পূৰ্বে পথ নিৰ্মাণৰ কাম সম্পূৰ্ণ নকৰিলে বিধায়িকা গৰাকীক বেলটৰ যোগেদি ইয়াৰ প্ৰত্যুত্তৰ দিব বুলি হুংকাৰ দিয়ে ভুক্তভোগী ৰাইজে ৷
লগতে পঢ়ক: লামডিঙত ভয়ংকৰ পথ দুৰ্ঘটনা ; নিহত এজন
