টীয়ক, 12 জুলাই : যোৰহাট জিলাৰ অভিভাৱক মন্ত্ৰী ডাঃ ৰণোজ পেগুৰ নিৰ্দেশ মৰ্মে জিলা উপায়ুক্ত অশোক কুমাৰ বৰ্মন আৰু আৰক্ষী অধীক্ষক অংকুৰ জৈনে টীয়ক ৰাজহ চক্ৰ অন্তৰ্গত চিন্তামণিগড় ঘোৰাচৰা পথাৰৰ অঞ্চল ড্ৰোণৰ সহায়ত পৰিদৰ্শন কৰে ৷ ক'ভিড প্ৰট'কল ৰাইজে পালন কৰিছে নে নাই তাক পৰিদৰ্শন কৰে দুই প্ৰশাসনিক বিষয়াই ৷ বিষয়াদ্বয়ক সংগ দিয়ে টীয়ক ৰাজহ চক্ৰ বিষয়া সৌভিক ভূঞাই ৷
পৰিদৰ্শন কৰাৰ পাচতে ৰাইজক ক'ভিডৰ নীতি-নিয়ম মানি চলিবলৈ কঠোৰভাৱে নিৰ্দেশ দিয়ে যোৰহাট জিলা উপায়ুক্ত গৰাকীয়ে ৷ ইয়াৰ লগতে যোৰহাট আৰু শিৱসাগৰ জিলাৰ সমীন্তৱৰ্তী অঞ্চলসমূহ বাঁহৰ বেৰাৰে বন্ধ কৰিবলৈ স্থানীয় আৰক্ষীক নিৰ্দেশ দিয়ে ৷ চিন্তামণিগড় অঞ্চলত ভয়াৱহভাৱে বৃদ্ধি পাইছিল ক'ভিড আক্ৰান্তৰ সংখ্যা ৷
ভগামুখ, চিন্তামণিগড়, জেলেঙীটোপ আদি ঠাইসমূহ বৰ্তমান ক'ভিডৰ ৰেড জ'ন হিচাপে চিনাক্ত কৰা হৈছে ৷ সেয়েহে এই ঠাইসমূহত ক'ভিডক ৰোধ কৰাৰ উদ্দেশ্য ড্ৰোণৰ সহায়ত পৰিদৰ্শন কৰা হয় বুলি জানিবলৈ দিয়ে জিলা প্ৰশাসনে ৷ তদুপৰি ক'ভিড সংক্ৰমণ বৃদ্ধিৰ সময়চোৱাত অবৈধ সুৰা তথা চুলাই মদৰ আড্ডাসমূহৰ পৰা যাতে অধিক সংক্ৰমণ নহয় তাৰ প্ৰতি লক্ষ্য ৰাখি জিলা প্ৰশাসনে অবৈধ সুৰাৰ বিৰুদ্ধে তীক্ষ্ণ দৃষ্টি ৰাখিছে ৷
সোমবাৰৰ পৰা দুদিনীয়াকৈ সম্পূৰ্ণ লকডাউন ঘোষণা কৰা হৈছে যোৰহাট জিলাত ৷ যাৰ বাবে জিলাখনৰ গ্রামাঞ্চলসমূহত আৰক্ষী, চি আৰ পি এফ, এন ডি আৰ এফ বাহিনী তথা স্থানীয় প্ৰশাসনৰ সহযোগত তহল দি সকলোকে ক'ভিড বিধি অৱলম্বন কৰিবলৈ আহ্বান জনায় ৷ যোৰহাট-শিৱসাগৰ সীমাৱৰ্তী অঞ্চল জাঁজীত ৩৭ নং ৰাষ্ট্ৰীয় ঘাই পথৰ ওপৰত যান-বাহন তালাচী অব্যাহত ৰাখিছে আৰক্ষীয়ে ৷ ইফালে, এক সপ্তাহৰ বাবে যোৰহাট জিলাক ৰেড জ'ন ঘোষণা কৰিছে প্ৰশাসনে ৷
