মাজুলী, 16 এপ্ৰিল : মাজুলীৰ ৫০০ বছৰীয়া আধ্যাত্মিক পৰম্পৰা অক্ষুন্ন ৰাখি সম্পূৰ্ণ ধৰ্মীয় পৰম্পৰাগত ৰীতি নীতিৰে মাজুলীবাসীয়ে সত্ৰসমূহত ব’হাগ বিহু উদযাপন কৰা পৰিলক্ষিত হয় ৷ মাজুলীৰ ঐতিহাসিক ৩৫ খন সত্ৰত ধৰ্মীয় ৰীতি নীতিৰে বিহু পালন কৰাৰ সমান্তৰালকৈ ব'হাগৰ দ্বিতীয় দিনা মাজুলীত গোঁসাই বিহু উদযাপন কৰা হয় ৷ উল্লেখ্য যে, গোঁসাই বিহু সাত বিহুৰ এক অন্যতম বিহু ৷
ঐতিহাসিক এলেঙি নৰসিংহ সত্ৰত মাজুলীবাসীয়ে ১৯৪ বছৰীয়া কলিয়া গোঁসাইৰ স্নান উৎসৱৰ আয়োজন কৰাৰ পৰিপ্ৰেক্ষিতত পুৱাৰে পৰা এই উৎসৱৰ বাবে এক উখল মাখল পৰিবেশে বিৰাজ কৰে । হৰিনামৰ ধ্বনি, আয়তী সকলৰ নাম, সমূহীয়া নাম, বৰগীত, দিহানাম আদিৰ ধ্বনিৰে জীপাল হৈ পৰা পৰিৱেশৰ মাজতে পুৱাই সত্ৰাধিকাৰ সমন্বিতে ভকত বৈষ্ণৱ সকলে কলীয়া গোঁসাইক পৰম্পৰাগত ভাৱে স্নান কৰায় । ইয়াৰ লগতে পৰম্পৰা অনুসৰি সত্ৰাধিকাৰ আৰু আই মাতৃ সেৱাৰ পৰম্পৰাও আজি পালন কৰা হয় । সকলো জীয়ৰী, বোৱাৰী, ডেকা, সত্ৰাধিকাৰ, বৈষ্ণৱ সকলে কুশল মংগলৰ বাবে সেৱা লোৱাৰ লগতে গোঁসাই সকলেও সকলোকে চুলি চিঙি আৰ্শীবাদ জনায় ।
উল্লেখ্য যে, মাজুলী আউনীআটী সত্ৰতো গোঁসাই বিহু উপলক্ষে প্ৰসংগীয়া নাম, সংকীৰ্তন, হিয়া নাম, নটুৱা গায়ন বায়ন আদি পৰিবেশন কৰা হয় আৰু সত্ৰাধিকাৰকো সকলোৱে সেৱা কৰে । অন্যান্য সত্ৰ সমূহৰ লগতে উত্তৰ কমলাবাৰী, নতুন কমলাবাৰী সত্ৰতো পৰম্পৰা অনুসৰি মাজুলীবাসীয়ে বিহু উদযাপন কৰে । পুৱা সকলো ভকত-বৈষ্ণৱ, শিষ্য-প্ৰশিষ্য আহি গোঁসাইক সেৱা জনায় ।
লগতে পঢ়ক : পহিলা বহাগত ঘৰে ঘৰে গৈ মাহ-হালধি সানিলে দৰঙীয়াল গাঁৱৰ গঞাই
