যোৰহাট, 21 অক্টোবৰঃ গাঁৱৰ মুনিহ তিৰোতাৰ পৰা কণ কণ শিশুলৈকে সকলো লৱৰি আহিছে ৷ শৱ দেহ লৈ গাঁওখনৰ একাংশ ব্যক্তি ভোগদৈ নৈ লৈ গৈছে হিলদ'ল ভাঙি ৷ সকলো ওলাই আহিছে অন্তিম সৎকাৰৰ বাবে ৷ চাঙীত থকা মৃতদেহ কেইটা সাধাৰণ মানুহৰ নহয়,ৰাজ্য চৰকাৰৰ জল সম্পদ মন্ত্ৰী কেশৱ মহন্ত আৰু দেৰগাঁও সমষ্টিৰ বিধায়ক ভবেন ভৰালীৰ মৃতদেহ লৈ ৰাইজৰ ব্যস্ততা ৷
লগতে চাওকঃ পৰিৱৰ্তনকামী ৰাজ্যত উন্নয়নৰ ফোঁপোলা ছবি!
প্ৰকৃততে বান গৰাখহনীয়াত অতিষ্ঠ পশ্চিম যোৰহাটবাসীৰ হাতত নাছিল কোনো উপায় ৷ আবেদনৰ পিচত আবেদন দি দি ভাগৰি পৰা অঞ্চলটোৰ ৰাইজে অৱশেষত জল সম্পদ মন্ত্ৰী কেশৱ মহন্ত আৰু দেৰগাঁও সমষ্টিৰ বিধায়ক ভবেন ভৰালীৰ প্ৰতীকি শৱদেহ দাহ কৰি সাব্যস্ত কৰিলে প্ৰতিবাদ ৷ কাৰণ জনপ্ৰতিনিধিয়ে কাণসাৰ নিদিয়ে তেওঁলোকৰ সমস্যাক ৷ বিগত মে মাহতে পশ্চিম যোৰহাটৰ বৃহত্তৰ অঞ্চল ভোগদৈ নদীৰ বাঢ়নী পানীয়ে বুৰাই পেলোৱাৰ পাছত আজিও বানৰ কৱলৰ পৰা পৰিত্ৰাণ নাপালে গাঁওবাসীয়ে। ভোগদৈৰ বানত উটি গ'ল বহুতৰে ঘৰবাৰী,মাটি,ভেটি ৷ সোমবাৰে ৰাইজৰ ধৈৰ্যৰ বান্ধ চিঙি গ'ল,দেৰগাঁও বিধানসভা সমষ্টিৰ অন্তৰ্গত মালৌ খাটৰ ৰাইজে অকৰ্মন্য বিধায়ক আৰু জলসম্পদ মন্ত্ৰীৰ শৱদেহ লৈ নদীৰ পাৰত দাহ কৰে ৷ তেওঁলোকৰ দাবী শীঘ্ৰে যাতে ভোগদৈৰ বানৰ কৱলত পৰা লোকসকলক সু-ব্যৱস্থা কৰি দিয়ে ৷
