যোৰহাট, 10 আগষ্ট: সোমবাৰে যোৰহাটৰ অগ্নিকাণ্ড সংঘটিত হোৱা ঘটনাস্থলী পৰ্যবেক্ষণ কৰে বিধানসভাৰ অধ্যক্ষ হিতেন্দ্ৰ নাথ গোস্বামীয়ে ৷ ঘটনাস্থলী পৰ্যবেক্ষণ কৰি তেওঁ কয় যে,পৰিৱেশ-পৰিস্থিতি নিৰীক্ষণ কৰা পাচত জিলাখনৰ অগ্নি নিৰ্বাপক বাহিনীক আধুনিকীকৰণ কৰা হ’ব ৷ অগ্নি নিৰ্বাপক বাহিনীত নতুনত্ব অনা হ’ব ৷ ৰাজ্য চৰকাৰলৈ অনুৰোধ কৰাৰ লগতে দুৰ্ভগীয়া পৰিয়ালটোক চৰকাৰী সাহাৰ্য প্ৰদান কৰা আশ্বাস দিয়ে অধ্যক্ষ গৰাকীয়ে ৷
উল্লেখ্য যে, দেওবাৰে পুনৰ যোৰহাটত সংঘটিত হয় এক ভয়ংকৰ অগ্নিকাণ্ডৰ ঘটনা । প্ৰাপ্ত তথ্য অনুসৰি, দেওবাৰে নিশা 1.30 বজাত যোৰহাট চহৰৰ এ টি ৰোডৰ সমীপৰ মাৰোৱাৰী পট্টিৰ গোপাল সিংঘি নামৰ লোকজনৰ ঘৰত সংঘটিত হয় এই অগ্নিকাণ্ড ৷ লোকজনৰ নিজ ঘৰৰ কাষতে আছিল যান-বাহনৰ যন্ত্ৰ-পাতি বিক্ৰীৰ প্ৰতিষ্ঠান । বৈদ্যুতিক বিসংগতিৰ বাবে সংঘটিত হোৱা অগ্নিকাণ্ডত বহু লক্ষাধিক টকাৰ সা-সম্পত্তি জাহ যায় । ইয়াৰ লগতে কাষৰীয়া চাৰিটা বাসগৃহলৈও সম্প্ৰসাৰিত হৈছে জুই ৷ ঘটনাস্থলীত অগ্নি নিৰ্বাপক বাহিনীৰ লগতে চিনামৰা অ’ এন জি চি আৰু বায়ুসেনাৰ অগ্নি নিৰ্বাপক বাহন উপস্থিত হৈ জুই নুমুৱাবলৈ সক্ষম হয় ৷ ঘটনাৰ পাচতে সমগ্ৰ যোৰহাট চহৰত এক উত্তেজনাময় পৰিৱেশৰ সৃষ্টি হয় ৷
এই অগ্নিকাণ্ডত গোপাল সিংঘিৰ পৰিয়ালৰ 5 জনকৈ লোক গুৰুতৰভাৱে আঘাতপ্ৰাপ্ত হয় ৷ আহত লোককেইগৰাকীক যোৰহাট চিকিৎসা মহাবিদ্যালয় হাস্পতাললৈ প্ৰেৰণ কৰা হয় যদিও ইয়াৰ মাজৰ দুগৰাকী সদস্য গোমতী দেৱী আৰু সত্যনাৰায়ণ আগৰৱালা ইতিমধ্যে মৃত্যু হোৱা বুলি জিলা প্ৰশাসনে জানিবলৈ দিয়ে। আনহাতে,আহত কেইগৰাকী হৈছে-মহেন্দ্ৰ আগৰৱালা,কৃষ্ণ গোপাল আগৰৱালা আৰু উষা আগৰৱালা বুলি জানিব পৰা গৈছে ৷
