মৰিয়নী, 31 মে’: মৰিয়নীত সংঘটিত হোৱা গণ প্ৰহাৰ তথা হত্যাকাণ্ডই জোকাৰি গৈছে সমগ্ৰ ৰাজ্য ৷ ক্ৰমাগতভাৱে ৰাজ্যখনত সংঘটিত হোৱা গণ প্ৰহাৰৰ ঘটনা তথা মৰিয়নীত সংঘটিত হোৱা 23 বছৰীয়া চফল যুৱক দেৱাশীষৰ হত্যাকাণ্ডই হতবাক কৰি তুলিছে ৰাজ্যৰ সচেতন মহলক ৷ মানৱ জাতিক লজ্জানত কৰা এই নৃশংস হত্যাকাণ্ড সংঘটিত কৰা হত্যাকাৰীক কৰায়ত্ত কৰি উচিত শাস্তি বিহাৰ দাবীত দেওবাৰে ৰাজপথ কপাঁলে আছুসহ বিভিন্ন দল-সংগঠনে ৷
দেবেৰাপাৰ আৰক্ষী চকীত প্ৰতিবাদ সাব্যস্ত কৰা বিভিন্ন দল সংগঠন সহ প্ৰতিবাদকাৰী সকলৰ সৈতে আলোচনাৰ বাবে আৰক্ষী চকীত আহি উপস্থিত হয় উচ্চপদস্ত আৰক্ষী বিষয়া ৷ অন্যহাতে আঞ্চলিক ছাত্ৰ সন্থাৰ মৰিয়নী আৰু নকচাৰী আঞ্চলিকৰ সহযোগত যোৰহাট জিলা ছাত্র সন্থাৰ শতাধিক কৰ্মকৰ্তাই আজি দেবেৰাপাৰ চাৰিআলিত ধোদৰ আলি অৱৰোধ কৰি এক প্ৰতিবাদী কাৰ্যসূচী ৰূপায়ন কৰে ৷ দোষীক কৰায়ত্ত কৰাৰ লগতে ঘটনাটোৰ উচিত তদন্তৰ দাবী কৰে মৰিয়নীৰ বিধায়ক ৰূপজ্যোতি কূৰ্মীয়ে ৷
উল্লেখযোগ্য যে, বৰ্তমানলৈকে গাভৰু বাগিছাৰ আশীষ নায়ক, শচীন চাঁওৰা, ৰাধেশ্যাম কুৰ্মী আৰু অশোক চাঁওৰা নামৰ চাৰিজন হত্যাকাৰীক আটক কৰিবলৈ সক্ষম হৈছে আৰক্ষী ৷ যোৰহাট চিকিৎসা মহাবিদ্যালয়ত মৰনোত্তৰ পৰীক্ষাৰ অন্তত আজি বিয়লি দেৱাশীষৰ নশ্বৰ দেহ মৰিয়নী মিল গাঁওৰ নিজৰ বাসগৃহলৈ অনা হয় ।
তাৰ পাছতে লোকে লোকাৰণ্য হৈ পৰে দেৱাশীষৰ বাসগৃহ ৷ কান্দোনৰ ৰোল উঠে দুৰ্ভগীয়া দেৱাশীষৰ বাসগৃহত ৷ বাসগৃহত উপস্থিত হয় মৰিয়নী বিধায়ক ৰূপজ্যোতি কুৰ্মীৰ লগতে জিলা প্ৰশাসনৰ কেইবাজনো উচ্চপদস্থ বিষয়া ৷ ইতিমধ্যে যোৰহাট জিলা প্ৰশাসনে সমগ্ৰ ঘটনাটো দণ্ডাধীশ পৰ্য্যায়ৰ তদন্তৰ বাবে অতিৰিক্ত জিলা উপায়ুক্ত বিশ্বজিত ফুকনক দায়িত্ব দিয়ে ৷
লগতে পঢ়কঃ হায়দৰাবাদত আৱদ্ধ অসমৰ 20 যুৱকঃ চৰকাৰলৈ সহায়ৰ আহ্বান
