যোৰহাট,18 জুনঃ বৰ অসমৰ খনিকৰ চাও ল্যুং চ্যুকাফাক লৈ পৰোচনামূলক মন্তব্যৰে টুইট কৰা গৰ্গ ছেটাৰ্জীৰ বিৰুদ্ধে টীয়ক আৰক্ষী থানাত এজাহাৰ দাখিল অসম প্ৰেমী যুৱ ছাত্ৰ সমাজৰ ৷ কেৱল এজাহাৰেই নহয়,অসম তথা উত্তৰ পূৰ্বাঞ্চলৰ লোকক দেশৰ বিভিন্ন প্ৰান্তত বহু সময়ত নানাধৰণে ঠাট্টা-মস্কৰা কৰাৰ উপৰি অপৰাধমূলক কাণ্ড সংঘটিত কৰাৰ বাবে সংগঠনটোৱে গৰ্গ ছেটাৰ্জীৰ দৰে ব্যক্তিকেই দোষী সাব্যস্ত কৰে ৷ ভাৰত-চীন সীমান্তত দুয়োদেশৰ সেনাবাহিনীৰ মাজত সংঘৰ্ষৰ পাছতেই সমগ্ৰ দেশৰ জনসাধাৰণ ক্ষোভিত হৈ পৰিছে চীন প্ৰশাসনৰ বিৰুদ্ধে ৷ সমগ্ৰ ভাৰতে এই বৰ্বৰ ঘটনাৰ বাবে চীনক গৰিহণা দিয়াৰ সময়তে অসমৰ বাসিন্দাক চীনা লোকৰ সৈতে তুলনা কৰি প্ৰৰোচনামূলক মন্তব্য প্ৰদান কৰে কলকাতাৰ গৰ্গ ছেটাৰ্জী নামৰ এজন ব্যক্তিয়ে ৷
17 জুনৰ সন্ধিয়া ৯ বাজি ১৯ মিনিটত গৰ্গ ছেটাৰ্জীয়ে নিজৰ টুইটাৰ একাউন্টযোগে বৰ অসমৰ স্ৰষ্টা চাও ল্যুং চ্যুকাফাক চীনা আক্ৰমণকাৰী বুলি উল্লেখ কৰিছিল ৷ লগতে চ্যুকাফাৰ প্ৰতিমূৰ্তি স্থাপন কৰি মূখ্যমন্ত্ৰী সৰ্বানন্দ সোণোৱাল নেতৃত্বাধীন বিজেপি চৰকাৰে ৰাইজৰ কৰৰ অপপ্ৰয়োগ কৰিছে বুলি মন্তব্য কৰিছিল অসম সম্বন্ধে সামান্যতম জ্ঞান নথকা গৰ্গ ছেটাৰ্জী নামৰ ব্যক্তি গৰাকীয়ে ৷ অসমীয়াৰ প্ৰাতঃষ্মৰণীয় চ্যুকাফা,গৌৰৱোজ্জল ৬০০ বছৰীয়া আহোম শাসন,আহোম সম্প্ৰদায় আৰু অসমীয়া জাতিৰ ওপৰত কৰা বিকৃত আৰু উচটনিমূলক মন্তব্যত জাঙুৰ খাই উঠিছে অসম প্ৰেমী যুৱ-ছাত্ৰ সমাজ ৷ উল্লেখযোগ্য যে,ইয়াৰ পূৰ্বেও বহুবাৰ সামাজিক মাধ্যমত অসমীয়াৰ সম্পৰ্কত বিকৃত আৰু উচটনিমূলক মন্তব্য প্ৰদান কৰি আহিছে এই ব্যক্তিজনে ৷ বাৰে বাৰে অসম, অসমীয়া আৰু অসমৰ ইতিহাসক বিকৃত কৰিবলৈ চেষ্টা কৰা এই ব্যক্তিজনৰ মন্তব্যৰ প্ৰতিক্ৰিয়া অসম চৰকাৰে কেনেদৰে দিয়ে সেয়া হ’ব লক্ষ্যণীয় ৷
লগতে পঢ়কঃ COVID-19 : বিশ্বৰ সামগ্ৰিক তথ্য
