টীয়ক, 2 চেপ্তেম্বৰ: বিগত 30 আগষ্টত ইটিভি ভাৰতযোগে প্ৰকাশ হোৱা এটা বাতৰিৰ পাচতেই পোহৰৰ মুখ দেখিলে জাঁজীমুখৰ কুমলীয়া চাপৰিবাসীয়ে ৷ বিগত 10 বছৰৰ পূৰ্বে জাঁজীমুখৰ কুমলীয়া চাপৰিৰ গৰাখহনীয়াত সৰ্বস্বান্ত হোৱা 33 টা পৰিয়ালক সংস্থাপন দিয়া হৈছিল গড়খাৱৈৰ ফুকনবাৰীত ৷ ফুকনবাৰীত সংস্থাপন দিয়া পৰিয়াল কেইটাক ভিন্ন সুবিধাৰ লগতে সৌভাগ্য আঁচনিৰ জৰিয়তে বিদ্যুৎ যোগানৰ ব্যৱস্থা কৰা হৈছিল ৷ কিন্তু বিদ্যুৎ সংযোগ নকৰিলে বিদ্যুৎ বিভাগে ৷ বৈদ্যুতিক খুটা, ট্ৰেন্সফৰ্মাৰ আদি স্থাপন কৰিলে যদিও ৰাইজ বঞ্চিত হৈ থাকিল বিদ্যুতৰ পোহৰৰ পৰা ৷
ভুক্তভোগী ৰাইজে তেওঁলোকৰ সমস্যা সন্দৰ্ভত উৰ্ধতম কৰ্তৃপক্ষক বহু আবেদন-নিবেদন কৰিছিল যদিও, তেওঁলোকে বিদ্যুৎ বিভাগৰ তৰফৰ পৰা পোৱা নাছিল কোনো ধৰণৰ বিহীত ব্যৱস্থা ৷ কিন্তু 30 আগষ্টত ইটিভি ভাৰতে বৃহত্তৰ অঞ্চলটোৰ ৰাইজৰ দুৰ্দশাৰ এক বাতৰি সম্প্ৰচাৰ কৰিছিল ৷ সেই বাতৰিয়ে দৃষ্টি আকৰ্ষণ কৰিব পাৰিলে উৰ্ধতম কৰ্তৃপক্ষকো ৷ সেই বাতৰিয়ে উৰ্ধতম মহলৰ দৃষ্টি আকৰ্ষণ কৰিবলৈ সক্ষম হোৱাৰ পাচতেই বুধবাৰে বিদ্যুৎ সংযোগ লাভ কৰিলে কুমলীয়া চাপৰিবাসীয়ে ৷ অঞ্চলটোৰ ঘৰে ঘৰে জ্বলি উঠা লাইটৰ পোহৰে সম্প্ৰতি এক বুজাব নোৱাৰা আনন্দৰ ঢল নমাই আনিছে স্থানীয় বাসিন্দাৰ মাজলৈ ৷ লগতে এই সকলোবোৰৰ বাবে তেওঁলোকে কৃতজ্ঞতা আৰু ধন্যবাদ জ্ঞাপন কৰিলে ইটিভি ভাৰতৰ সাংবাদিকক ৷
