আমগুৰি,22 জানুৱাৰীঃ অসম প্ৰদেশ কংগ্ৰেছৰ উদ্যোগত সমগ্ৰ ৰাজ্যজুৰি গ্ৰহণ কৰা “জন জাগৰণ যাত্ৰা” আজি আমগুৰিত আহি উপস্থিত হয় । নাগৰিকত্ব সংশোধনী আইনৰ বিৰোধিতাৰে ৰাষ্ট্ৰীয় দলটোৱে সৰুপথাৰৰ পৰা আৰম্ভ কৰা এই “অস্তিত্ব ৰক্ষাৰ জন জাগৰণ যাত্ৰা” গহপুৰত গৈ সামৰণি পৰিব । তাৰ মাজতে প্ৰদেশ কংগ্ৰেছৰ সভাপতি ৰিপুন বৰাৰ নেতৃত্বত আমগুৰিত আহি উপস্থিত হোৱা এই যাত্ৰাই আমগুৰি নগৰৰ লগতে নগৰৰ উপকণ্ঠ একাংশকো সামৰি লয় । "কেন্দ্ৰীয় চৰকাৰৰ ন্যায়পালিকাৰ ওপৰত কোনো নাই । সেয়েহে উচ্চতম ন্যায়ালয়ে কেন্দ্ৰীয় চৰকাৰৰ পৰা যোৱা মাহতেই প্ৰতিবেদন বিচৰাৰ পিছতো প্ৰতিবেদন দাখিল কৰা নাই।“ – সাংবাদিকৰ সতে হোৱা এক সাক্ষাৎকাৰত এনেদৰে প্ৰকাশ কৰে প্ৰদেশ কংগ্ৰেছৰ সভাপতি ৰিপুন বৰাই ।
আনহাতে নাগৰিকত্ব সংশোধনী আইনৰ শুনানি দিনাই আমগুৰিত গেজেট নটিফিকেচন দাহ । আমগুৰিৰ বহুকেইটা জাতীয় দল-সংগঠনে গেজেট নটিফিকেচন দাহ কৰি প্ৰতিবাদ সাব্যস্ত কৰে । সংশোধিত নাগৰিকত্ব সংশোধনী আইন ২০১৯ বাতিলৰ দাবীত উচ্চতৰ ন্যায়ালয়ে আজি প্ৰদান কৰা শুনানিক লৈ সন্তুষ্ট নহয় আমগুৰিৰ জাতীয় দল- সংগঠন । আমগুৰিৰ আহোম জাতীয় গণমঞ্চ, ছাত্ৰ মুক্তি সংগ্ৰাম সমিতি, সদৌ অসম জাতীয়তাবাদী যুৱ ছাত্ৰ পৰিষদ,আটাছুকে ধৰি জাতীয় সংগঠনে আইনখনৰ বিৰোধীতাৰে প্ৰতিবাদ সাব্যস্ত কৰে ৷
