বেকাজান,24 ফেব্ৰুৱাৰীঃ অসম নাগালেণ্ড সীমান্তৰ বেকাজান ৬২ ঘৰীয়া গাঁৱৰ এগৰাকী ব্যক্তিৰ মৃতদেহ চুবুৰীয়া ৰাজ্য নাগালেণ্ডৰ চাংপাঙ বস্তিৰ এলেকাত ৰহস্যজনকভাৱে উদ্ধাৰ হোৱাৰ ঘটনাই সম্প্ৰতি তীব্ৰ প্ৰতিক্ৰিয়া সৃষ্টি কৰিছে । বেকাজান আৰক্ষী চকীৰ অন্তৰ্গত বাষষ্ঠি ঘৰীয়া নিবাসী প্ৰয়াত ধদুৱা চুতীয়াৰ পুত্ৰ ৰমেশ চুতীয়া নামৰ লোকজনে দেওবাৰে পুৱা নগা পাহাৰৰ কাষত দিন হাজিৰা কাম কৰিবলৈ গৈ নিৰুদ্দেশ হয় । সন্ধিয়ালৈ ৰমেশ চুতীয়া ঘৰলৈ উভতি নহাত পৰিয়ালৰ লোকে গাঁওবাসীৰ সহযোগত নগা পাহাৰত ৰাতি এঘাৰ মান বজালৈকে সন্ধান চলাই যদিও কোনো সন্ধান উলিয়াব নোৱাৰিলে । ঘটনাৰ সন্দৰ্ভত পৰিয়াললোকে বেকাজান আৰক্ষী চকীত খবৰ দিয়ে । নিশা ৯ বজাত বেকাজান আৰু বৰহোলা থানাৰ এটা পোন্ধৰ জনীয়া যৌথ আৰক্ষী দলে ঘটনাস্থলি উপস্থিত হৈ ব্যক্তিজনক পাহাৰৰ দাঁতিত বিচাৰ খোচাৰ কৰে যদিও আৰক্ষীয়েও ব্যক্তিজনৰ শুংসূত্ৰ উলিয়াবলৈ অসমৰ্থ হয় ৷
আনহাতে, সোমবাৰে পুৱাই পুনৰ গাঁওবাসী আৰু পৰিয়াললোকে নাগালেণ্ডৰ পাহাৰৰ সন্ধান চলাওঁতে এটি জুৰিৰ কাষত উলংগ আৰু ডিঙি চিপ থোৱা অৱস্থাত ৰমেশ চুতীয়াৰ মৃতদেহ প্ৰত্যক্ষ কৰে । মৃতদেহটোৰ এখন হাত ভঙা আছিল । এই খবৰ লাভ কৰাৰ পিছত বেকাজান আৰু বৰহোলা আৰক্ষী গৈ ঘটনাস্থলীত উপস্থিত হয় । লগে লগে অসম আৰক্ষীয়ে নাগালেণ্ডৰ ৱাখা জিলাৰ চাংপাঙ আৰক্ষী থানাত খবৰ দিয়ে । পিছত চাংপাঙ আৰক্ষীয়ে উপস্থিত হৈ মৃতদেহ উদ্ধাৰ কৰি তিতাবৰৰ দণ্ডাধিশৰ উপস্থিতত বেকাজান চমজাই দিয়ে ৷ বেকাজান আৰক্ষীয়ে মৃতদেহটো মৰণোত্তৰ পৰীক্ষাৰ বাবে যোৰহাট চিকিৎসা মহাবিদ্যালয়লৈ প্ৰেৰণ কৰে । অৱশ্যে মৰণোত্তৰৰ প্ৰতিবেদনৰ পিছতহে মৃত্যুৰ প্ৰকৃত কাৰণ জানিব পৰা যাব এয়া আত্মহত্যা নে হত্যাকাণ্ড ।
পৰিয়ালৰ লোকে তেখেতক কোনো দুৰ্বত্তই পাহাৰত হত্যা কৰা বুলি সন্দেহ প্ৰকাশ কৰিছে । যিহেতু মৃতদেহ উদ্ধাৰ সময়ত হাত ভঙা আছিল । ইফালে গাঁওবাসীয়ে বেকাজান সীমান্ত অঞ্চলত কিছুদিনৰ পৰা এটি সশস্ত্ৰ নগা উগ্ৰপন্থী দলে বিচৰণ কৰি কৰ সংগ্ৰহৰ তথ্য লাভ কৰা পৰিপ্ৰেক্ষিতত এই ঘটনাত উগ্ৰপন্থীয়ো জৰিয়ত থকাৰ সন্দেহ প্ৰকাশ কৰিছে । সম্প্ৰতি ৰাইজে এই ঘটনাৰ উচিত তদন্তৰ দাবী উত্থাপন কৰিছে ৷
লগতে পঢ়ক-কোকৰাঝাৰ জিলাৰ নতুন আৰক্ষী অধীক্ষক হিচাপে যোগদান ৰাকেশ ৰৌশনৰ
