যোৰহাট, 6 ছেপ্তেম্বৰ: শনিবাৰে নিশা যোৰহাটৰ চন্দন নগৰৰ ৪ নম্বৰ বাইলেনৰ এটা ভাড়াঘৰত ক্ষত-বিক্ষত অৱস্থাত উদ্ধাৰ হৈছিল জে.কে. শইকীয়া হমিঅ'পেথিক মহাবিদ্যালয়ৰ কনিষ্ঠ চিকিৎসক ডাঃ ৰাহুল বসুমতাৰীৰ মৃতদেহ ৷ সেই ঘটনাৰ 38 ঘণ্টা সম্পূৰ্ণ হোৱাৰ পূৰ্বেই যোৰহাট আৰক্ষী জালত পৰিল হত্যাকাণ্ডৰ লগত জড়িত অভিযুক্ত ৷ যোৰহাটৰ টোকোলাই গবেষণা কেন্দ্ৰ সমীপৰ পৰা দিগন্ত তাঁতী নামৰ যুৱকজনক গ্ৰেপ্তাৰ কৰাৰ পাচতেই ওলাই পৰে সকলো তথ্য ৷ অভিযুক্ত দিগন্তই নিজ মুখে স্বীকাৰ কৰে চিকিৎসক গৰাকীক হত্যা কৰাৰ কথা ৷
প্ৰায়েই চিকিৎসক গৰাকীৰ ঘৰলৈ অহা-যোৱা চলিছিল অভিযুক্ত দিগন্ত তাঁতীৰ ৷ অভিযুক্তই প্ৰথমে চিকিৎসক গৰাকীক হত্যা কৰি তেওঁৰ মটৰ চাইকেলখনৰ লগতে, নগদ ২৭৮৫০ টকা, এটা ব্লুটুথ স্পিকাৰ, পাৱাৰ বেংক, দুটা ঘড়ী, কেমেৰাৰ লগতে বহু সামগ্ৰী লৈ উধাও হয় ৷ দেওবাৰে যোৰহাট সদৰৰ এগৰাকী লোকৰ ঘৰৰ ঘৰৰ পৰা আৰক্ষীয়ে বাইকসহ জব্দ কৰে অভিযুক্তই লৈ অনা সামগ্ৰী সমূহ ৷ আনহাতে অভিযুক্তৰ ঘৰত চলোৱা তালাচীত আৰক্ষীয়ে উদ্ধাৰ কৰে চিকিৎসকগৰাকীৰ কেমেৰাটো ৷ কি কাৰণে দিগন্ত তাঁতী নামৰ যুৱকজনে ডাঃ ৰাহুল বসুমতাৰীক হত্যা কৰিলে সেই বিষয় অধিক তদন্তৰ পাচতহে পোহৰলৈ আহিব বুলি উল্লেখ কৰে যোৰহাট জিলাৰ আৰক্ষী অধীক্ষক মৃণাল তালুকদাৰে ৷
