হোজাই, 15 নৱেম্বৰ : হোজাই জিলা প্ৰশাসনৰ সহযোগত আৰু বন বিভাগৰ উদ্যোগত ৮ আৰু ৯ নৱেম্বৰত লামডিং বনাঞ্চলত চলিছিল উচ্ছেদ অভিযান ৷ উক্ত বনাঞ্চলত অবৈধভাৱে বসবাস কৰি থকা ভূমিত চলিছিল প্ৰশাসনৰ বুলড’জাৰ ৷ তাৰ দুদিন পিছতে পুনৰ লামডিং বনাঞ্চলৰ থাদংনলাত জিলা প্ৰশাসনে চলাই উচ্ছেদ অভিযান । সম্প্ৰতি উচ্ছেদিত লোকসকলে বাস কৰি আছে অস্থায়ী শিবিৰত ৷
সোমবাৰে হোজাইৰ উচ্ছেদিত জনতাৰ কাষত উপস্থিত হয় আমছুৰ সভাপতি ৰেজাউল কৰিম সৰকাৰ ৷ লামডিঙৰ নখুঁটিৰ উচ্ছেদিত জনতাৰ কাষত উপস্থিত হৈ সামগ্ৰিক পৰিস্থিতিৰ বুজ লয় আমছুৰ সভাপতিগৰাকীয়ে ৷ আমছু নেতা বকুল আহমেদৰ লগতে জিলাখনৰ দলীয় কৰ্মীসকলক লগত লৈ নখুঁটিত উপস্থিত হয় সৰকাৰ ৷ সৰকাৰে অস্থায়ী শিবিৰত বাস কৰা লোকসকলৰ মনৰ বুজ লোৱাৰ লগতে কম্বল আৰু খাদ্য সামগ্ৰী বিতৰণ কৰে ৷
