হোজাই, 26 জুলাই : হোজাইৰ লংকাত গ্ৰাহকৰ এটিএম কাৰ্ড সলনি কৰি ধন লুট কৰি নিয়াৰ এক ঘটনা সংঘটিত হৈছে ৷তথ্য অনুসৰি, লংকাৰ উদালী পহৰা চকীৰ অন্তৰ্গত ছামচুন নেহাৰ নামৰ এগৰাকী মহিলাই 22 তাৰিখে লংকাৰ এটা এটিএমৰ পৰা ধন উলিয়াবলৈ আহিছিল ৷ সেই সময়তে অচিনাক্ত দুজন লোকে মহিলা গৰাকীক টকা উলিওৱাত সহায় কৰিব বুলি কৈ এটিএম আৰু গোপন চাৰি নম্বৰৰ পিন সংগ্ৰহ কৰে ৷ কৌশলগত ভাৱে সেই নামতে আন এখন এটিএম মহিলা গৰাকীৰ হাতত অৰ্পণ কৰি ঘটনাস্থলীৰ পৰা পলায়ন কৰে দুই দুৰ্বৃত্তই ৷ পিছত তিনিআলি ষ্টেট বেংক শাখা কৰ্তৃপক্ষৰ পৰাহে ভুক্তভোগী মহিলাগৰাকীয়ে জানিব পাৰে যে, দুৰ্বৃত্তই মহিলাগৰাকীৰ কাৰ্ডৰ জৰিয়তে পাঁচ হাজাৰ টকা উলিয়াই নিছে |
ঘটনা সন্দৰ্ভত ভুক্তভোগী মহিলা গৰাকীয়ে উদালী আৰক্ষী পহৰা চকীত সেই দিনাই এজাহাৰ দাখিল কৰিছিল যদিও আজি পৰ্যন্ত ঘটনা সন্দৰ্ভত কোনো শুংসূত্ৰ উলিয়াব পৰা নাই আৰক্ষীয়ে |
