হোজাই,১৬ জানুৱাৰী: শুকুৰবাৰে হোজাইৰ লস্কৰ পথাৰত সংঘটিত হোৱা ঘটনাৰ ন্যায়ৰ দাবীত আজি লংকাত পথ অৱৰোধ কাৰ্যসূচী ৰূপায়ণ কৰে হিন্দুত্ববাদী নেতা সত্যৰঞ্জন বৰাই । লংকা থানাৰ সমীপৰ মূল পথৰ মাজতে বহি মহিলাসকলে প্ৰতিবাদ সাব্যস্ত কৰে । বৰ্তমান আৰক্ষী, চি আৰ পি এফ, জিলা দণ্ডাধীশ প্ৰতিবাদস্থলীত উপস্থিত হৈ পথ মুকলি কৰিবলৈ সত্যৰঞ্জন বৰাৰ সৈতে আলোচনা অব্যাহত ৰাখিছে ।
কিন্তু আৰক্ষীয়ে ঘটনাৰে জড়িত আটাইকেইজন লোকক আটক নকৰা পৰ্যন্ত পথ অৱৰোধ কাৰ্যসূচী অব্যাহত থাকিব বুলি হুংকাৰ দিয়ে বৰাই । শুকুৰবাৰে হোজাইৰ তেওঁৰ বাসগৃহৰ পৰা ১ কিঃমিঃ দূৰৰ লস্কৰ পথাৰত এখন সভাত অংশগ্ৰহণ কৰিবলৈ গৈছিল বৰা । একাংশ লোকে সেই সময়তে উত্তেজিত হৈ পৰে আৰু তেওঁক সেই স্থানৰ পৰা খেদি পঠিয়ায় ।
এই ঘটনাৰ পিছতে তেওঁ কেইবাজনো লোকৰ বিৰুদ্ধে আক্ৰমণ কৰাৰ অভিযোগ উত্থাপন কৰি আৰক্ষী থানাত এজাহাৰ দাখিল কৰে । আৰক্ষীয়ে তিনিজন লোকক আটক কৰিছে যদিও ঘটনাৰে জড়িত আটাইকেইজন লোককে কৰায়ত্ত কৰিবলৈ সত্যৰঞ্জন বৰাই দাবী জনায় ।
লগতে পঢ়ক:নাৰায়ণপুৰত হিমন্ত বিশ্ব শৰ্মা ফ'ল'ৱাৰ্ছ গোটৰ কাৰ্যালয় উদ্বোধন
