হোজাই,৯ মে': হোজাই জিলাৰ লংকাৰ কাকীত অভিযোগ প্ৰতি অভিযোগ পতি-পত্নীৰ। এই অভিযোগ প্ৰতি অভিযোগ পালেগৈ থানাৰ মজিয়া । এফালে যৌতুকৰ বাবে পত্নীক মাৰধৰ কৰাৰ অভিযোগ স্বামীৰ বিৰুদ্ধে ৷ ইফালে,পত্নীগৃহৰ পৰিয়ালে স্বামীক প্ৰহাৰ কৰাৰো প্ৰতি অভিযোগ ৷
পত্নীৰ অভিযোগ অনুসৰি,কাকী আৰক্ষী থানাৰ অন্তৰ্গত ২নং কাকীৰ সঞ্জীৱ বাছাৰ সৈতে বিবাহ পাশত আৱদ্ধ হৈছিল পত্নী দীপমণি হাজৰিকা ৷ বিবাহৰ পিছৰ পৰা নানা কাৰণত পত্নীৰ ওপৰত শাৰীৰিক নিৰ্যাতন চলোৱাৰ অভিযোগ স্বামী সঞ্জীৱ বাছাৰ বিৰুদ্ধে ৷ আনকি,যৌতুকৰ বাবে মাৰপিট কৰাৰো গুৰুতৰ অভিযোগ তুলি ইতিমধ্যে কাকী থানাত ভুক্তভোগী মহিলা গৰাকীয়ে স্বামী পৰিয়ালৰ বিৰুদ্ধে এখন এজাহাৰ দাখিল কৰিছে ৷ আনহাতে, সঞ্জীৱ বাছাৰ বিৰুদ্ধে উঠা এই অভিযোগ খণ্ডন কৰি সঞ্জীৱ বাছাই এয়া এক মিছা অপবাদ বুলি ব্যক্ত কৰে ৷ লগতে,পত্নীৰ পৰিয়ালৰ লোকে বেয়াকৈ প্ৰহাৰ কৰাৰ সন্দৰ্ভত কাকী আৰক্ষী থানাত পত্নীৰ পৰিয়ালৰ বিৰুদ্ধে এখন এজাহাৰ দাখিল কৰে। অৱশ্যে আৰক্ষীৰ তদন্তৰ পাছতহে স্পষ্ট হ'ব প্ৰকৃত ঘটনা ৷
