হোজাই, ২২ নৱেম্বৰ: হোজাইৰ লামডিং সংৰক্ষিত বনাঞ্চল(Lumding Reserve Forest)ত প্ৰশাসনে উচ্ছেদ অভিযান চলোৱাৰ সময়তে পোহৰলৈ আহিছে বহু চাঞ্চল্যকৰ তথ্য । বন বিভাগৰ একাংশ বিষয়াৰ নাম সাঙোৰ খাইছে ভূমি বেদখলৰ সৈতে । এই সন্দৰ্ভতে দেওবাৰে নিশা হোজাই আৰক্ষী(Hojai Police)য়ে আটক কৰে বল বিভাগৰ বিট অফিচাৰ (Forest Beat officer) হাবিবুৰ ৰহমান আৰু কালাম নামৰ এগৰাকী বন কৰ্মীক । সম্প্ৰতি দুয়োৰে জেৰা অব্যাহত ৰাখিছে আৰক্ষীয়ে ।
পূৰ্বেও ৮ গৰাকী বন কৰ্মীক আৰক্ষীয়ে আটক কৰিছিল । কেইদিনমান পূৰ্বে আৰক্ষীয়ে সন্দেহযুক্ত ভূ-মাফিয়া ড৹ ৰহমত আলী লস্কৰক আৰু নজৰুল ইছলাম নামৰ ভূ-মাফিয়া(Land Mafia Nazrul Islam) কো গ্ৰেপ্তাৰ কৰিছিল । নজৰুলে বিভিন্ন ঠাইৰ লোকক ধনৰ বিনিময়ত লামডিং সংৰক্ষিত বনাঞ্চলত থকা আৰু খেতি কৰাৰ ব্যৱস্থা কৰি দিছিল । বন বিভাগৰ একাংশ ঘোচখোৰ বিষয়াৰ ছত্ৰছায়াত থাকি নজৰুলৰ দৰে ভূ-মাফিয়াই লামডিং সংৰক্ষিত বনাঞ্চলক পৈত্তিক সম্পত্তিৰ দৰে ব্যৱহাৰ কৰাৰ অভিযোগ উত্থাপিত হৈছে ।
আনহাতে, নিজকে প্ৰকৃতিপ্ৰেমী বুলি পৰিচয় দিয়া ড৹ ৰহমত আলী লস্কৰে নজৰুলৰ সহায়ক হিচাপে কাম কৰিছিল । ইফালে, এতিয়ালৈকে বিষয়া-কৰ্মীসহ বন বিভাগৰ মুঠ ১০ জন লোকক আৰক্ষীয়ে আটক কৰিছে । বন বিভাগৰ লোককেইজনক জেৰা চলাই অধিক তথ্য জানিব পাৰিব বুলি আৰক্ষীয়ে আশা প্ৰকাশ কৰিছে ।
লগতে পঢ়ক:Akhil met CM : কইনাধৰাত এঘন্টা কি কথা পাতিলে অখিল গগৈ-হিমন্ত বিশ্ব শৰ্মাই ?
