হোজাই,10 জুন : হোজাইৰ কাকী অঞ্চলত উচ্ছেদ অভিযানৰ তীব্ৰ প্ৰতিক্ৰিয়া প্ৰকাশ কৰিছে মুছলিম ছাত্ৰ সন্থা(Muslim Student Union) অসমে । এফালে অতিমাৰী কৰ’ণাৰ সময়ত চৰকাৰে ঘৰত থাকিবলৈ নিৰ্দেশ দিয়ে, আনফালে মুছলমানক টাৰ্গেট কৰি নিজ ঘৰৰ পৰা উচ্ছেদ কৰিছে বুলি অভিযোগ মুছলিম ছাত্ৰ সন্থাৰ । এই উচ্ছেদ কিমান যুক্তিসংগত বুলি প্ৰশ্ন কৰিছে মুছলিম ছাত্ৰ সন্থা অসমৰ সাধাৰণ সম্পাদক আশ্বিক ৰাব্বানীয়ে ।
অসমৰ মুখ্যমন্ত্ৰী ডঃ হিমন্ত বিশ্ব শৰ্মালৈ মুছলিম ছাত্ৰ সন্থা(Muslim Student Union), অসমৰ সাধাৰণ সম্পাদক আশ্বিক ৰাব্বানীয়ে আহ্বান জনাই কয় যে প্ৰথমে সংস্থাপন দিয়ক, পিছত উচ্ছেদ কৰক । অসমত কৰ’ণাৰ কবলত পৰি প্ৰতি সপ্তাহত শ শ লোকৰ মৃত্যু হৈছে ৷ তেনে সময়ত এই ভূমিহীন, গৃহহীন লোকসকলক উচ্ছেদৰ জাননী দিয়াটো চৰম অমানৱীয় আৰু হঠকাৰী সিদ্ধান্ত বুলি মন্তব্য কৰে আশ্বিক ৰাব্বানীয়ে ৷ এই লোকসকলক সংস্থাপিত কৰাটো চৰকাৰৰ দায়িত্ব । তাকে নকৰি উচ্ছেদৰ জাননীৰে চৰম সংকট তথা মৃত্যুৰ মুখলৈ ঠেলি দিয়াটো কেতিয়াও সমৰ্থনযোগ্য হ'ব নোৱাৰে বুলি মত প্ৰকাশ কৰে সাধাৰণ সম্পাদক গৰাকীয়ে ।
উল্লেখ্য যে, আশ্বিক ৰাব্বানীয়ে চৰকাৰক অতি সোনকালে এই উচ্ছেদিত লোকসকলক উপযুক্ত ক্ষতিপূৰণসহ পুনৰ সংস্থাপনৰ ব্যৱস্থা কৰিবলৈ দাবী জনায় । অন্যথা ভাৰতীয় নাগৰিকৰ ওপৰত কৰা অমানৱীয় উচ্ছেদ বিৰুদ্ধে গণতান্ত্ৰিক আন্দোলন কৰিবলৈ বাধ্য হ'ব বুলি কয় মুছলিম ছাত্ৰ সন্থা(Muslim Student Union) অসমৰ সাধাৰণ সম্পাদক আশ্বিক ৰাব্বানীয়ে ।
লগতে পঢ়ক : অসম আৰক্ষীত নিযুক্তি দিয়া হ'ব 12,000 নিৱনুৱাক
