হাইলাকান্দি, 13 অক্টোবৰ : হাইলাকান্দিৰ নিতাইনগৰ কাণ্ডৰ সৈতে জড়িত থকাৰ সন্দেহত 6 জনকৈ লোকক গ্ৰেপ্তাৰ কৰিছে আৰক্ষীয়ে ৷ নিতাইনগৰ গাঁৱত অভিযান চলাই প্ৰথমে ৰফিকুল হুচেইন লস্কৰ, নুৰুল হক লস্কৰ, আনাম উদ্দিন লস্কৰ, মানিক উদ্দিন লস্কৰ আৰু ছাইফুল্লা আহমদ লস্কৰ নামৰ 5 জন লোকক গ্ৰেপ্তাৰ কৰে ৷ শনিবাৰ ৰাতি এই 5 জনকে হাইলাকান্দি সদৰ আৰক্ষী থানাত সোধা-পোছা কৰাৰ লগতে দেওবাৰে দিনত বিশেষ আদালতত উপস্থিত কৰোৱা হয় । ইয়াৰ পাছতে 3 দিনৰ বাবে আৰক্ষী জিম্মালৈ নিয়া হৈছে আটকাধীন পাঁচজনকে ৷
আনহাতে, দেওবাৰে ৰাতিপুৱা পুনৰ এক অভিযান চলাই গ্ৰেপ্তাৰ ঘটনাৰ হৈছে জড়িত ছিৰাজ উদ্দিন লস্কৰক গ্ৰেপ্তাৰ কৰে আৰক্ষীয়ে । ধৃত ছিৰাজ উদ্দিন হাইলাকান্দি জিলা পৰিষদৰ চতুৰ্থ শ্ৰেণীৰ কৰ্মচাৰী ।
ম'হ চুৰক কেন্দ্ৰ কৰি সমগ্ৰ ঘটনাৰ সূত্ৰপাত হৈছিল যদিও ইতিমধ্যে ম'হ দুটা উদ্ধাৰ কৰিবলৈ সক্ষম হৈছে আৰক্ষী ৷ ঘটনাৰ পিছৰ পৰাই আৰক্ষীয়ে প্ৰতি মুহূৰ্তত নিতাইনগৰ আৰু ইয়াৰ পাৰ্শ্বৱৰ্তী এলেকাত অভিযান অব্যাহত ৰাখিছে । আৰক্ষী আৰু চিআৰপিএফ বাহিনীয়ে চলোৱা এই অভিযানৰ ফলত গোটেই এলেকাত আতংকময় পৰিস্থিতিয়ে বিৰাজ কৰিছে ।
