হাইলাকান্দি, অক্টোবৰ 10 : বাৰ্মিজ চুপাৰীৰ ছিণ্ডিকেটে ভয়ানক ৰূপ লৈছে ৰাজ্যত ৷ বৰাক উপত্যকাৰ এগৰাকী বিধায়কে উদঙাইছে চুপাৰী ছিণ্ডিকেটৰ ভয়ংকৰ তথ্য ৷ ৰাজ্যখনত চলি থকা চুপাৰী ব্যৱসায়ত বাৰ্মিজ চুপাৰীৰ বাবে সংকটত পৰিছে থলুৱা চুপাৰী ব্যৱসায়ীসকল ৷ বাৰ্মিজ চুপাৰীয়ে বিপদ ঘণ্টা বজাইছে থলুৱা ব্যৱসায়ীৰ ৷ টকা নিদিলে মেঘালয়ত প্ৰৱেশ কৰিবলৈ দিয়া নহয় থলুৱা চুপাৰী সৰবৰাহকাৰী ট্ৰাক ৷
অবৈধ বাৰ্মিজ চুপাৰী সৰবৰাহকাৰী ট্ৰাকৰ সমান্তৰালকৈ থলুৱা চুপাৰীৰ ট্ৰাকেও দিব লাগে ছিণ্ডিকেটৰ ধন ৷ সকলো বৈধ নথি-পত্ৰ, GST চালান, কৃষি বিভাগৰ অনুমতি পত্ৰ থকাৰ পাচতো থলুৱা ব্যৱসায়ীসকলে দিব লগীয়া হৈছে মোটা অংকৰ ধন ৷ বৃহস্পতি বাৰে হাইলাকান্দিত এখন সংবাদমেল সম্বোধন কৰি এই তথ্য প্ৰকাশ কৰে কাটলিছেড়া সমষ্টিৰ বিধায়ক সুজাম উদ্দিন লস্কৰে ৷ বিধায়কগৰাকীয়ে দাঙি ধৰা তথ্য অনুসৰি, সকলো বৈধ নথি-পত্ৰ থকাৰ পাচতো বুধবাৰে মেঘালয়ৰ উংকিয়াং গেটৰ পৰা মেঘালয় আৰক্ষীয়ে ওভটাই পঠিয়াই তিনিখন থলুৱা চুপাৰী ভৰ্তি ট্ৰাক ৷ বৰাক উপত্যকাৰ পৰা গুৱাহাটীলৈ আহি আছিল ট্ৰাক কেইখন ৷ প্ৰত্যেকখন ট্ৰাকৰ পৰা আৰক্ষীক ধন নিদিয়াৰ বাবেই এনেদৰে ঘূৰাই পঠিওৱা হয় ট্ৰাককেইখন ৷
উল্লেখ্য যে, এই গেটেৰেই ধনৰ বিনিময়ত অবৈধ বাৰ্মিজ চুপাৰী সৰবৰাহকাৰী ট্ৰাক পাৰ কৰোৱাৰ অভিযোগ তুলিছে এ আই ইউ ডি এফৰ বিধায়ক গৰাকীয়ে ৷ এই ক্ষেত্ৰত সৰ্বানন্দ সোণোৱাল চৰকাৰে এইয়া কেনে ধৰণৰ দুৰ্নীতি বিৰোধী শূন্য সহনশীলতা গ্ৰহণ কৰিছে বুলিও প্ৰশ্ন কৰে সুজাম উদ্দিন লস্কৰে ৷ ধনৰ বিনিময়ত গেট পাৰ কৰোৱা বাৰ্মিজ চুপাৰীৰ অবৈধ ব্যৱসায়ৰ বাবেই এতিয়া থলুৱা চুপাৰী ব্যৱসায়ীসকল বিপদত পৰিছে বুলি দাবী কৰে বিধায়ক লস্কৰসহ একাংশ ব্যৱসায়ীয়ে ৷
